अखबार नेपाल ट्रेन्डिङ

काठमाडौं: क्रिकेट रंगशाला निर्माणलाई महत्त्व दिइरहेका प्रधानमन्त्री केपी शर्मा ओलीले आज क्यानका पदाधिकारी खेलाडी सहित कलाकारहरुसँग बैठक राखेका छन् ।

प्रधानमन्त्री ओलीले सामाजिक सञ्जालमा तस्बिर पोस्ट गर्दै यो भेटघाटबाट आफू उत्साहित भएको बताएका छन् । यससँगै रंगशाला निर्माणको कामलाई द्रुत गतिमा अगाडि बढाउने काममा सहयोग मिल्ने उनको भनाइ छ । क्यान सचिव पारस खड्का बैठकमा उपस्थिति थिए भने काठमाडौंमा उपलब्ध राष्ट्रिय क्रिकेट खेलाडी तथा क्रिकेटप्रेमी कलाकारहरूको पनि सहभागित रहेको थियो । बैठकमा गायक बद्री पंगेनी, प्रकाश सपुत, अभिनेत्रीहरू केकी अधिकारी, नीति शाह, मिरुना मगर, गायिका रचना रिमाल, हास्यव्यङ्ग्य कलाकार राजा राजेन्द्र पोखरेल बैठकमा सहभागी थिए ।

बैठकमा क्रिकेट रंगशाला निर्माणमा प्रधानमन्त्रीले दिएको तदारुकतालाई लिएर क्यान सचिव पारस खड्का र खेलाडीहरूले आभार प्रकट गरे । रंगशाला मात्र नभएर समग्र क्रिकेटको विषयमा अनौपचारिक कुराकानी भएको थियो । केही कलाकारहरूले खेलाडीहरूको सेवा सुविधा अझै कम भएको भन्दै वृद्धि गर्न सुझाव दिएका थिए । क्यान सचिव खड्काले भने रंगशाला निर्माणपछि क्यान आफैँ आर्थिकरुपमा सक्षम हुने भएकाले खेलाडीको सेवा सुविधामा सरकारको मुख ताकिरहनु नपर्ने बताए ।

प्रधानमन्त्री ओलीले हिजो मात्रै क्यान अध्यक्ष चतुरबहादुर चन्द र सचिव पारस खड्कासँग भेटघाट गरेका थिए । उक्त भेटघाट पनि रंगशालाकै विषयमा केन्द्रित थियो । त्यसो त प्रधानमन्त्री बनेर पदबहाल गरेपछि ओलीको पहिलो निर्णय नै कीर्तिपुर क्रिकेट मैदानलाई सुविधा सम्पन्न रंगशाला बनाउने थियो । प्रधानमन्त्री ओलीले चितवनमा निर्माण सुरु भएर लामो समयदेखि अलपत्र परिरहेको गौतमबुद्ध क्रिकेट रंगशालाप्रति भने कुनै चासो दिएका छैनन् ।