अखबार नेपाल ट्रेन्डिङ

काठमाडौं: नेपालसँग कूटनीतिक, आर्थिक एवं जनसम्बन्ध समेत रहेको मित्रराष्ट्र कतारका राजा अमिर शेख तामिम विन हमद अल थानी आज र भोलि दुई दिनका लागि नेपालको भ्रमणमा आउने भएका छन् ।

राष्ट्रपति रामचन्द्र पौडेलको औपचारिक निम्तोमा कतारका अमिर नेपाल आउने दिन आज सरकारले देशभर सार्वजनिक विदा दिने निर्णय गरेको छ ।

थानीको भ्रमणका क्रममा नेपालले लाभ लिन सक्ने ठाउँ प्रशस्त छन् । भ्रमणका क्रममा दुई देशवीच सहयोग आदान-प्रदान सम्बन्धी महत्वपूर्ण सम्झौताहरुमा हस्ताक्षरको तयारी छ । खेलकूद क्षेत्रमा फड्को मारेको कतारले नेपाललाई यस क्षेत्रमा धेरै ठूलो सहयोग पुर्याउन सक्छ । धनी देश कतारबाट नेपालको कषि, उद्योग र पर्यटनको क्षेत्रमा लगानी भित्र्याउने वातावरणका रुपमा पनि यो भ्रमणलाई लिन सकिन्छ ।

कतारी राजाको भ्रमणबाट कतारमा कार्यरत नेपालीहरुमा सकारात्मक प्रभाव पार्न सक्छ । यो भ्रमणले कतारमा नेपालीहरुको सम्मान बढाउन सक्छ, जुन हाम्रा लागि थप मनोवैज्ञानिक उपलब्धि हुनेछ । कतार र नेपालको सम्बन्धका आयामहरुबारे आर्थिक राजनीतिक विश्लेषण र समीक्षाहरु यो दुई दिनमा हुने नै छन् ।

कतारी राजा थानीको सुरक्षाको जिम्मा नेपाली सेनालाई दिइएको र अरु घेरामा अन्य सुरक्षाकर्मी रहने छन् । कतारी राजालाई राष्ट्रपति रामचन्द्र पौडेलले त्रिभुवन अन्तर्राष्ट्रिय विमानस्थलमै गएर स्वागत गर्ने कार्यक्रम तय भएको छ ।  नेपाल आएलगत्तै कतारका राजा राष्ट्रपति कार्यालय शीतलनिवास जाने कार्यक्रम रहेको छ । शीतलनिवासमा राष्ट्रपति पौडेल र कतारका अमिरबीच नेपाल–कतार द्विपक्षीय सम्बन्धमा छलफल हुनेछ । राष्ट्रपति पौडेलले कतारी राजा थानीको स्वागतमा बेलुका रात्रिभोजको आयोजना गर्दैछन् । पर्सी प्रधानमन्त्री पुष्पकमल दाहाल प्रचण्ड र कतारी राजाबीच द्विपक्षीय वार्ता हुनेछ ।