भरतपुर भ्रमण वर्ष २०२४ को उद्घाटन कार्यक्रममा प्रचण्डसहित पूर्वप्रधानमन्त्रीहरुको सहभागी हुने
वि.सं.२०८० फागुन १७ बिहीवार १०:४९
काठमाडौं: फागुन १८ गते शुक्रबारदेखि सुरु हुने भरतपुर भ्रमण वर्ष २०२४ को उद्घाटन कार्यक्रममा प्रधानमन्त्री पुष्पकमल दाहाल ‘प्रचण्ड’सहित पाँच पूर्व प्रधानमन्त्री सहभागी हुने भएका छन् ।
नारायणी नदी किनारमा उद्घाटन हुने भ्रमण वर्ष २०२४ को उद्घाटनको लागि प्रधानमन्त्री पुष्पकमल दाहाल प्रचण्ड आजै चितवन जाँदै छन् । सरकार गठबन्धनका सहयात्री दलहरुमध्ये नेकपा समाजवादीका अध्यक्ष माधवकुमार नेपाल, नेपाली काँग्रेसका सभापति शेरबहादुर देउवा, प्रमुख प्रतिपक्षी दल नेकपा एमालेका अध्यक्ष केपी शर्मा ओली र पूर्व प्रधानमन्त्री झलनाथ खनाल, पूर्व मन्त्रीपरिषद् अध्यक्ष खिलराज रेग्मी सहभागी हुने भरतपुर महानगरपालिकाले जानकारी दिएको छ ।
कार्यक्रममा पूर्वप्रधानमन्त्रीहरु सबैको लागि मन्तव्यको समय पनि निर्धारण गरिएको छ । अन्य पूर्व प्रधानमन्त्रीको सहभागितालाई सामान्य लिए पनि निरन्तर गठबन्धन सरकारको आलोचना गर्दै आएका एमाले अध्यक्ष ओलीले सहजै भरतपुर महानगरको निमन्त्रणा स्वीकार गर्नुलाई राजनीतिक कोर्ष परिवर्तनको सुरुआतको रुपमा विश्लेषण पनि गरिएको छ ।
दुई चरणमा सञ्चालन हुने उद्घाटन सत्रमा राष्ट्रिय स्तरका गायक गायिकाहरुको प्रस्तुति रहने छ भने भरतपुर महानगरका ५० हजारबढी मानिस भ्रमणवर्ष उद्घाटनमा सहभागी गराउने महानगरले तयारी गरेको छ । उद्घाटन अघि बिहान ११ बजे भरतपुरका विभिन्न स्थानबाट र्याली सहित मानिसहरुको सहभागिता रहने तालिका महानगरले सार्वजनिक गरेको छ ।
वि.सं.२०८० फागुन १७ बिहीवार १०:४९