प्रधानमन्त्री प्रचण्ड र कांग्रेस सभापति देउवाबीच भेटवार्ता, वर्तमान गठबन्धन तलमाथि नहुने देउवाको सन्देश
वि.सं.२०८० फागुन ११ शुक्रवार १२:४२
काठमाडौं: प्रधानमन्त्री पुष्पकमल दाहाल ‘प्रचण्ड’ र नेपाली कांग्रेसका सभापति शेरबहादुर देउवाबीच भेटवार्ता भएको छ । प्रधानमन्त्री दाहाललाई भेटन सभापति देउवा आज बिहान प्रधानमन्त्री निवास बालुवाटार पुगेका थिए ।
कांग्रेस महासमिति बैठक सकिएलगत्तै सभापति देउवा प्रधानमन्त्री दाहाललाई भेटन पुगेका हुन् । सभापति देउवाले महासमिति बैठकमा छलफल भएका विषय र निष्कर्ष प्रधानमन्त्री दाहाललाई सुनाएका थिए । प्रधानमन्त्री दाहाल र सभापति देउवाबीच आसन्न राष्ट्रिय सभा अध्यक्षको निर्वाचन, वर्तमान सत्ता गठबन्धन, महासमिति बैठकलगायत विषयमा छलफल भएको थियो । छलफलमा कांग्रसका प्रमुख सचेतक रमेश लेखक, उपप्रधानमन्त्री पूर्णबहादुर खडका, नेता कृष्णप्रसाद सिटौला उपस्थित थिए ।
महासमिति बैठकमा नेकपा माओवादी केन्द्रसँग गठबन्धन गरेर कांग्रेसले गल्ती गरेको र अबका निर्वाचनमा कांग्रेस एक्लै लड्ने विषयमा अधिकांशले आवाज उठाएका थिए । महासमिति बैठकमा जेजस्ता विषयमाथि छलफल भएपनि वर्तमान गठबन्धन तलमाथि नहुने सन्देश सभापति देउवाले प्रधानमन्त्री दाहाललाई दिएको बालुवाटार स्रोतले बताएको छ ।
भेटमा कांग्रेसका नेताहरूले वर्तमान गठबन्धनको विकल्प नखोजिने र अहिलेकै गठबन्धनलाई बलियो बनाएर लैजान कांग्रेस तयार रहेको प्रचण्डलाई सुनाएका थिए । महासमिति बैठकमा वर्तमान सत्ता गठबन्धनको विषयमा भएको छलफलप्रति माओवादी नेतृत्व कांग्रेससँग सशंकित बनेको छ ।
वि.सं.२०८० फागुन ११ शुक्रवार १२:४२