अखबार नेपाल ट्रेन्डिङ

काठमाडौं: नेकपा सचिवालय बैठकले पुष्पकमल दाहाललाई कार्यकारी अध्यक्षको जिम्मेवारी दिएको छ । नेकपा अध्यक्ष तथा प्रधानमन्त्री केपी ओलीले सरकारको काम गर्ने र प्रचण्डले पार्टीको काम गर्नेगरी सचिवालय बैठकले जिम्मेवारी बाँडफाड गरेको हो ।

लामो समयदेखि चर्चा रहेपनि प्रचण्डलाई सचिवालय बैठकले कार्यकारी अधिकारी दिएको थिएन् । ‘अध्यक्ष केपी शर्मा ओलीले प्रधानमन्त्रीको हैसियतले सरकारको काममा केन्द्रित हुने र प्रचण्ड कार्यकारी अधिकार सहित पार्टी काममा केन्द्रित हुने निर्णय भएको छ’, आजको सचिवालय बैठकपछि पार्टी प्रवक्ता नारायणकाजी श्रेष्ठले भने ।

दुवै अध्यक्षको वरियता भने समान रहने सचिवालयको निर्णय छ । बैठक संयुक्त अध्यक्षतामा सम्पन्न हुने छ । तर आम रुपमा बैठकको अध्यक्षता र सञ्चालन दाहालले गर्नेछन् । यस्तै, ओली भने बाँकी कार्यकाल पनि प्रधानमन्त्री रहने सचिवालयको निर्णय छ । प्रतिनिधिसभाको यस कार्यकालमा सरकारको नेतृत्व ओलीले गर्ने र राजनीतिक स्थायित्वको सन्देश दिने निर्णय भएको श्रेष्ठले बताए ।