अखबार नेपाल ट्रेन्डिङ

काठमाडौं: राष्ट्रिय स्वतन्त्र पार्टीले आक्रामक रुपमा सदस्यता विस्तार गरिरहेको छ । बुधबारसम्म डेढ लाख बढीले सदस्यताका लागि आवेदन भरेका छन् ।

आवेदन भर्नेमा गाउँभन्दा सहरी क्षेत्रका बढी रहेको रास्वपाले जनाएको छ । रास्वपाका अनुसार ६३ हजारले अनलाइनबाट आवेदन दिएका छन् । ८५ हजारले हस्तलिखित आवेदन भरिसकेकाहरुको सदस्यता स्वीकृतिको प्रक्रियामा रहेको रास्वपाले जनाएको छ ।

त्यसअघि नै आवेदन दिएर स्वीकृत भएका ३२ हजारले पाँच वर्षको लागि सदस्यता नवीकरण गराइसकेको रास्वपाले जनाएको छ । केही समयअघि दैनिक पाँच हजारले फाराम भर्ने रास्वपामा अहिले २ सयभन्दा बढीले आवेदन दिइरहेको रास्वपाको भनाई छ ।

अघिल्लो वर्षको असार ७ मा गठन भएको रास्वपाले ४ मंसिरको चुनावमा २० सिट जितेको थियो । त्यसपछि रास्वपाबाट सभापति रवि लामिछाने उपप्रधान एवम् गृहमन्त्री भएको समय (पुस ११–माघ २२), वैशाख १० को उपचुनाव आसपासमा सदस्यता लिनेको भीड बढेको थियो ।

अहिलेको राजनीतिक तिक्तताका कारण कांग्रेस, एमाले, माओवादी लगायतका दलबाट असन्तुष्ट मात्र होइन, नयाँ युवाहरु पनि रास्वपाप्रति आकर्षित छन् ।

पार्टी गठन गरेको एक वर्ष पुगेको अवसरमा रास्वपाले केन्द्रीय समितिको बैठक राखेको छ । देशभरबाट प्राप्त भएका आवेदनहरुको वर्गीकरण गरेर बैठकमा पेस गर्ने तयारी छ ।

अहिले रास्वपाले अनलाइन आवेदन भर्ने सबैलाई सदस्य बनाउने नीति लिएको छ । देशभरका सबैलाई सदस्य बनाउने अभियान लिएको रास्वपाले बिना रोकतोक स्वीकृत गर्ने नीति लिएको छ । सदस्य बनेका कसैको उजुरी परेमा भने छानबिन गरेर निलम्बन समेत गर्ने व्यवस्था रास्वपामा छ । त्यसका लागि ४ सदस्यीय अनुशासन समिति छ ।

कुनै सदस्यले गलत काम गरे, कानुन मिचेको उजुरी परेमा यही समितिले अनुसन्धान गरेर छानबिन गर्नेछ र खराब काम गरेको पुष्टि भएमा निष्कासन/निलम्बन गर्न पार्टीमा सिफारिस गर्न सक्छ । रास्वपाले जिल्ला तहसम्म पनि अनुशासन समिति बनाउने तयारी गरेको छ ।