अखबार नेपाल ट्रेन्डिङ

काठमाडौं: देशभरबाट एक हजारभन्दा बढी मिटरब्याजीलाई यथाशीघ्र कानुनी दायरामा ल्याउन माग गर्दै पीडितको अर्को समूह पनि काठमाडौं आएको छ ।

काठमाडौंमा रहेका संघर्ष समितिसँग सरकारले सहमति गरे पनि विश्वस्त हुन नसकेको भन्दै उनीहरू प्रदर्शनका लागि काठमाडौं आएका हुन् ।

माइतीघरबाट सुरु भएको पीडितहरूको रयाली भद्रकालीसम्म पुगेको थियो । ‘मिटरब्याजी साहुलाई कारबाही गर, हाम्रो भूमि फिर्ता गर, हाम्रो आन्दोलन जारी छ, झुठो आश्वासन बन्द गर, सम्पूर्ण पीडितहरू एक हौँ’ लगायतका नारासहित प्लेकार्ड बोकेर पीडितहरूले आन्दोलन गरेका छन् ।

आन्दोलनका क्रमममा पीडितहरूले हलो, कोदाली समेत बोकेका थिए ।​ मिटरब्याज पीडितहरूको एउटा समितिसँग सरकारले ५ बुँदे सहमति गरेको छ ।

सहमतिका विषय कार्यान्वयन नभएसम्म विश्वस्त हुन नसकिने भन्दै रौतहट, सर्लाही, बारा, महोत्तरी लगायत जिल्लाबाट आएका पीडितहरू बल्खुको सडक छेउछाउका क्षेत्रमा बसेका छन् ।