नयाँ राष्ट्रपति चयनका लागि संघीय संसद् भवनमा मतदान जारी
वि.सं.२०७९ फागुन २५ बिहीवार १३:०४
काठमाडौं: नयाँ राष्ट्रपति चयनका लागि नयाँ बानेश्वरस्थित संघीय संसद् भवनको ल्होत्से हलमा मतदान मतदान जारी छ । बिहान १० बजेदेखि सुरु भएको मतदान दिउँसो ३ बजेसम्मको समय तोकिएको छ ।
अहिले दुई केन्द्रबाट मतदान भइरहेको छ । एउटा मतदान केन्द्रमा संघीय सांसद र अर्कोमा प्रदेश सांसदले मत खसाल्दै छन् । राष्ट्रपति निर्वाचनमा प्रत्येक प्रदेश सांसदको ४८ र संघीय सांसदको ७९ मतभार गणना हुन्छ ।
राष्ट्रपति निर्वाचनको अन्तिम नामावली अनुसार १४ राजनीतिक दलका सहित स्वतन्त्र र मनोनीत सांसदहरू मतदाता रहेका छन् । प्रदेशका ५५० र संघीय संसद्का ३३२ गरी कुल ८८२ जनाले मत हाल्न पाउनेछन् ।
नयाँ राष्ट्रपतिका लागि नौ दलीय गठबन्धनका तर्फबाट नेपाली कांग्रेसका नेता रामचन्द्र पौडेल र नेकपा (एमाले)का उपाध्यक्ष सुवास नेम्वाङ प्रतिस्पर्धामा छन् । मतदानपछि उनीहरूले मतदानस्थल परिसरमा एकार्कालाई जितको शुभकामना दिएका थिए ।
प्रधानमन्त्री पुष्पकमल दाहाल ‘प्रचण्ड’लगायत प्रमुख दलका शीर्ष नेताले मतदान गरिसकेका छन् । मतदान सकिए लगत्तै सर्वपक्षीय बैठक बसेर गणना सुरु गरिने निर्वाचन आयोगले जनाएको छ ।
वि.सं.२०७९ फागुन २५ बिहीवार १३:०४