अखबार नेपाल ट्रेन्डिङ

काठमाडौं: नेपाल समाजवादी कांग्रेसले दशैं, तिहार, छठ र नेपाल सम्बतको अवसरमा चियापान कार्यक्रमको आयोजना गर्दै मङ्सिर ४ गते हुने निर्वाचन बहिष्कारको औपचारिक रूपमा घोषणा गरेको छ ।

पार्टी मुख्यालय बानेश्वरमा आयोजित चियापान कार्यक्रमलाई सम्बोधन गर्दै पार्टी अध्यक्ष तथा ग्रेट हिमालय विचारका महान विचारक गोबिन्द निरौलाले देश जोगाउन निर्वाचन बहिष्कार गर्न सारा मतदाता समक्ष अपील गरेका छन् ।

समाजवादी कांग्रेसले यस अघि स्थानीय तहको निर्वाचन समेत बहिष्कार गरेको थियो । निर्वाचन आयोगमा दर्ता भए मध्येका पार्टी मध्ये समाजवादी कांग्रेस मात्र निर्वाचन बहिष्कार अभियानमा जुटेको एक मात्र पार्टी भएको सुचना आफूहरुले पाएको आयोगका एक पदाधिकारीले बताएका छन् ।

विश्व शान्तिका लागि, विश्वसंवैधानिकता र  नेपालको संबन्धमा संवैधानिक प्रजातन्त्र, हिन्दुराज्य, स्थानिय श्वशासन, समाजवादी अर्थनीती, विशेष अधिकारसहितको राजसंस्था लगायतका मुद्दा अगाडी सारेर निरन्तर आन्दोलनमा होमिएको सो पार्टीले देश जोगाउन निर्वाचन बहिष्कारको शर्त राख्दै आएको छ ।

शनिबार आयोजित चियापान समारोहमा निरौलाले देश जोगाउने अभिभारा सारा नेपालीसँग भएकाले निर्वाचन बहिष्कार गर्न पर्नेमा जोड दिएका हुन् । एशियन श्वाधिनताको निम्ति ग्रेट हिमालयन बिचारको प्रतिपादन गरेका निरौलाले आफ्नो पार्टीले अघि सारेका मुद्दामा एकदिन सिंगो राज्य एकजुट हुने बताउदै जनता समक्ष मतदानमा सहभागी नहुने अपिल गरेका हुन् ।

देशलाई बन्धकी राखेर बिदेशी संग कुम जोड्ने दर्जन नेतालाई हराउन सो पार्टीले गोप्य रूपमा अभियान चलाएको समेत निरौलाले खुलासा गरेका छन् । अधिकतम जनतालाई मतदान कार्यमा सरिक नगराउन सो पार्टीले हरेक निर्वाचन क्षेत्रमा पार्टीको टास्कफोर्स परिचालन गरेको छ ।