अखबार नेपाल ट्रेन्डिङ

गोरखा : मनास्लु हिमालको आधार शिविरमा हिम पहिरो गएको र केही पर्यटक बेपत्ता भएको प्रहरीले जनाएको छ । पर्यटक बेपत्ता भएको खबर आएपनि सोको पुष्टि हुन बाँकी रहेको प्रहरीले जनाएको हो ।

मनास्लु हिमाल शरदयाममा आरोहणका लागि निकै नै लोकप्रिय मानिन्छ । जिल्ला प्रहरी कार्यालय गोरखाका अनुसार घटनास्थलमा टोली गइरहेको छ ।

मनास्लु हिमाल आरोहण गर्न गएका विदेशी र उनीहरुका सहयोगी नेपालीहरु पनि मनास्लु आधार शिविरमा रहेका छन् । साथै ३ ४ वटा ट्रेकिङ कम्पनीको टोली आधार शिविर पुगेको बताइएको छ ।

आधार शिविरमा रहेका मिङ्मा शेर्पाले हिमपहिरो आएको तर कति शक्तिशाली हो भन्ने बारेमा जानकारी आइनसकेको बताएका छन् ।

पर्यटकको उद्धारका लागि सिम्रिक एयरको ९ एनटी एजेजेड कल साइनको हेलिकप्टर आधार शिविर पुगेको र अर्को हेलिकप्टर तयारी अवस्थामा रहेको बताइएको छ ।