अखबार नेपाल ट्रेन्डिङ

काठमाडौं: पाँच दलीय सत्तारुढ दलले प्रतिनिधि सभामा पाएको सिटको दोब्बर पाउने गरी प्रदेश सभातर्फको सिट बाँडफाँट गर्ने भएका छन् ।

३३० क्षेत्र रहेको प्रदेश सभाको बाँडफाँटका लागि आइतवार दिउँसो गठबन्धनका कार्यदलबीच छलफल चलिरहेको छ । आइतबारदेखि प्रदेश सभाको क्षेत्र केन्द्रित भएर गठबन्धन छलफलमा जुटेका हुन् ।

प्रतिनिधि सभाको १४८ सिट भागवण्डा टुंगो लगाएका गठबन्धनले बाँकी टुंगो लगाउनुअघि प्रदेश सभाबारे छलफल थालेका हुन् ।

प्रतिनिधि सभामा अहिलेसम्म सहमति भएका क्षेत्रलाई मात्र आधार बनाउँदा पनि कांग्रेसले प्रदेश सभाको १५० क्षेत्र पाउने निश्चित छ ।

माओवादी केन्द्रले ९०, एकीकृत समाजवादी पार्टीले ३०, जसपाले २४ र राष्ट्रिय जनमोर्चाले २ क्षेत्र पाउने निश्चित छ ।

प्रदेश सभाका अब बाँकी ३४ क्षेत्र मात्रै बाँडफाँट गर्न बाँकी छ । तर, यो आधारलाई मात्र चार दलले मानेका छैनन् । राष्ट्रिय जनमोर्चाले प्रदेश तर्फको ७ सिट हुनुपर्ने आफ्नो बटमलाइन बताएको छ ।

यस्तै जसपाले पनि ५० सिट दाबी गरेको छ । मधेस प्रदेश, प्रदेश १ का केही क्षेत्रमा आफ्नो प्रभाव राम्रो रहेको जसपाको दाबी छ ।

एकीकृत समाजवादीले कम्तीमा ७० सिट प्रस्ताव गरेको छ । आइतबारदेखि बल्ल प्रदेश सभाको सिटका विषयमा छलफल सुरु भएकोले टुंगो लाग्न समय लाग्नसक्ने नेताहरु बताउँछन् ।