केपी ओली र शेखर कोइरालाबीच दुई घण्टा भेटवार्ता
वि.सं.२०७९ भदौ १६ बिहीवार १८:४४
काठमाडौं: गठबन्धन दलबीच भागबण्डा विवाद नमिलिरहेका बेला नेपाली कांग्रेसका नेता डा. शेखर कोइराला र नेकपा एमालेका अध्यक्ष केपी शर्मा ओलीबीच दुई घण्टा वार्ता भएको छ ।
अध्यक्ष ओली गृहजिल्ला झापा जानुअघि कोइराला बिहीबार बालकोट पुगेर दुई घण्टा लामो समय भेटवार्ता गरेका हुन् ।
आगामी मंसिर ४ को संसदीय निर्वाचनका लागि कांग्रेस सभापति शेरबहादुर देउवाले माओवादी केन्द्रसँग मुख्य तालमेल गरेर अघि बढेपछि कोइरालाले एमालेसँग गरेको वार्तालाई अर्थपूर्ण रुपमा हेरिएको छ ।
बालकोटमा दुई नेताबीच भएको वार्ताको पुष्टि कोइराला र ओली दुवैको सचिवालयले गरेको छ । स्रोतका अनुसार उक्त वार्ता आगामी मंसिर ४ गते हुने प्रतिनिधिसभा र प्रदेशसभा निर्वाचनमा केन्द्रित थियो ।
कांग्रेसको १४औं महाधिवेशनपछि देउवाले आफूलाई पेलिरहेको गुनासो गरेका शेखरले मंसिरमा हुने निर्वाचनका लागि ४० प्रतिशत उम्मेदवारी दिनुपर्ने माग गरिरहेका छन् ।
उता देउवा गठबन्धन दलसँगै वार्तामा केन्द्रित भइरहेका बेला शेखरले पनि एमालेसँग संवाद गरेका हुन् ।
कांग्रेसमा आगामी निर्वाचनपछि बहुमत ल्याउने रणनीति सहित गठबन्धनमा सय सिटको दाबी गरिरहेको छ । तर बिहीबार बालुवाटारमा भएको गठबन्धन बैठकमा कांग्रेस ९० सिटमा झर्न तयार भएको छ ।
यस्तोमा ९० सिट आसपासमा झरेर सहमति गर्ने तयारी देउवाको छ । उता शेखर समूहले पार्टीमा मागेजति भाग नपाएको अवस्थामा चाल्न सकिने विकल्पका लागि पार्टीबाहिर पनि छलफल थालेको हो । त्यही अन्तर्गत शेखर बालकोट पुगेका छन् ।
स्रोतका अनुसार कांग्रेसमा शेखर समूहले देउवाले पेलेरै अघि बढेको अवस्थामा आगामी निर्वाचनमा कांग्रेसले छाडेका स्थानमा एमालेसँग मिलेर उम्मेदवारी दिने रणनीति समेत बनाएको बुझिएको छ ।
वि.सं.२०७९ भदौ १६ बिहीवार १८:४४