अखबार नेपाल ट्रेन्डिङ

काठमाडौं: नेपाल प्रहरीको अतिरिक्त महानिरीक्षक (एआईजी) बढुवा  रोक्न डिआईजीहरु नै लागि परेका छन् ।

एआईजी बढुवा सिफारिसविरुद्ध उजुरी डिआईजीहरुले नै उजुरी गरेका हुन । बढुवा उपरको उजुरी सुन्ने समितिमा आइतबार ईश्वरबाबु कार्की, घनश्याम अर्याललगायत आईजीपी शैलेश थापाको ब्याचका डीआईजीहरुले उजुरी हालेका हुन  ।

उनीहरुले वरीयता मिचेर सिफारिस गरेको भन्दै उजुरी हालेका छन् । त्यस्तै आफूहरु दाबेदार भएको जिकिर समेत गरेका छन् ।

बढुवा समितिले थपिएका तीन एआईजी दरबन्दीमा चैत १ गते डीआईजीहरू वसन्त पन्त, धिरजप्रताप सिंह र रविन्द्रबहादुर धानुकको सिफारिस गरेको थियो ।

समितिको सिफारिसविरुद्ध एक साताभित्र उजुरी गर्न सकिने कानुनी व्यवस्था छ । कसैले उजुरी नगरे उनीहरू एआईजीमा बढुवा बन्ने लगभग पक्कापक्की रहेको थियो ।

वरीयतामा अगाडि रहेका डीआईजी घनश्याम अर्याल, प्रकाशजङ कार्की र ईश्वरबाबु कार्कीले सिफारिसविरुद्ध तीव्र असन्तुष्ट जनाउदै उजुरी गरेका हुन  ।

यी तीनैजना वर्तमान आईजिपी शैलेश थापाका ब्याचीहरू हुन् । उनीहरूले वैशाख १८ बाट अवकाश पाउँदै छन् ।

सिफारिसमा परेका पन्त पनि आईजीपी थापाका ब्याची हुन् । अन्य दुई जना सिंह र धानुक एआईजी भए उनीहरू दुवै भावी आईजीपीका लागि प्रतिस्पर्धी मानिने छन् ।

सामाजिक सञ्जालमा सक्रिय ईश्वरबाबु कार्कीले सिफारिसविरुद्ध  राष प्रकट गर्दै आईरहेका छन् ।