अखबार नेपाल ट्रेन्डिङ

काठमाडौं: त्रिभुवन विमानस्थलबाट प्रहरीले करिव एक करोड मुल्य बराबरको अवैध सुन र मोबाइल बरामद गरेको छ ।

९९ लाख २९ हजार ६ सय ९८ रुपैयाँ मूल्य पर्ने १ किलो १५० ग्राम सुन र ५ थान मोबाइलसहित ३ जनालाई प्रहरीले पक्राउ गरेको छ ।

पक्राउ पर्ने मध्ये दुईजना दुबई र एक जना साउदी अरबबाट आएका हुन् ।

हिमालय एयरलाइन्सको जहाजबाट दुवईबाट आएका रौतहटको गौर नगरपालिका–१० सोबगाढाका ३२ वर्षीय सुनिल कुमार साहबाट चार थान आईफोन, एक थान सुनको बेरुवा औँठी  र १५० ग्रामका सुनको सिक्री बरामद गरेको छ ।

यस्तै, मकवानपुरको मनहरी-७ का २८ वर्षीय नवराज परियारको साथबाट आईफोन १ थान र सुनको बेरुवा औंठी-२ वटा बरामद भएको छ ।

अर्का एक यात्रु सारजहाबाट एयर अरेबियाबाट आगमन भएका सिन्धुपाल्चोकको भोटेकोशी गाउँपालिका-३ का ३९ वर्षीय दावा छिरिङ शेर्पाको साथबाट बेलनाकार बनाइएको अर्धठोस सुन ३ थान १ हजार ५५ ग्राम मलद्वारभित्र लुकाएको अवस्थामा फेला परेको प्रहरीले जनाएको छ ।

पक्राउ परेकालाई थप अनुसन्धानका लागि त्रिभुवन विमानस्थल भन्सार कार्यालय गौचरमा बुझाइएको प्रहरीले जनाएको छ ।