अखबार नेपाल ट्रेन्डिङ

काठमाडौं: नेपाली कांग्रेसको १४औं महाधिवेशन अन्तरगत आज प्रदेशसभा निर्वाचन क्षेत्रको अधिवेशन हुँदैछ ।

१३ वटा जिल्लामा सबै तहको अधिवेशन गरिसके पनि बाँकी जिल्लाले भने अहिलेसम्म पालिका तहको अधिवेशन मात्रै सम्पन्न गरेका छन् ।

आन्तरिक विवादका कारण केहि जिल्लामा पूर्वनिर्धारित कार्यतालिका प्रभावित भएको छ भने केहीमा आन्तरिक सहमतिमा प्रतिनिधिसभा निर्वाचन क्षेत्र र प्रदेशसभा निर्वाचन क्षेत्रको अधिवेशन एकैदिन गर्ने सहमति भएको छ ।

चार जिल्लामा विवादको कारण प्रदेशसभा निर्वाचन क्षेत्र अधिवेशन स्थगित भएको छ भने बाँके जिल्लामा आज हुनेछ । कांग्रेसको प्रदेश अधिवेशन मंसिर १६ र केन्द्रीय महाधिवेशन मंसिर २४–२६ गतेसम्म काठमाडौंमा हुनेछ ।

यसैबीच निर्वाचन समितिको बैठक आज बस्दैछ । पार्टी केन्द्रीय कार्यलय सानेपामा दिउँसो १ बजे बस्ने बैठकमा आजदेखि सुरु हुने प्रदेशसभा क्षेत्र अधिवेशनबारे थप छलफल गर्ने बताईएको छ ।

बैठकमा बाँकी रहेका ठाउँमा कात्तिक २७ देखि भइरहेको वडा अधिवेशनको बिषयमा पनि छलफल हुनेछ । यस्तै विभिन्न जिल्लाबाट आएका उजुरी र निर्वाचन हुन नसकेका ठाउँमा समन्वय गर्नेजस्ता कार्यका लागि  निर्वाचन समितिको बैठक बस्न लागेको हो ।