अखबार नेपाल ट्रेन्डिङ

काठमाडौं: प्रधानमन्त्री शेरबहादुर देउवाले भारतीय प्रधानमन्त्री नरेन्द्र मोदीलाई स्कटल्यान्डमा भेट्ने भएका छन् ।

स्कटल्यान्डको ग्लास्गोमा नोभेम्बर १ र २ तारिखमा आयोजना हुने संयुक्त राष्ट्रसंघीय जलवायु परिवर्तन सम्मेलन अन्तर्गतको ‘वर्ल्ड लिडर्स समिट’ का क्रममा भेट हुने भएको हो ।

बैठकमा भाग लिन नेपाली प्रतिनिधिमण्डलको नेतृत्व गर्दै देउवा र भारतीय प्रतिनिधिमण्डलको नेतृत्व गर्दै मोदी त्यसतर्फ जाँदै छन् ।

परराष्ट्र मन्त्रालयले भारतीय विदेशमन्त्रालयलाई पत्राचार गरी मोदीसँग भेटवार्ताका लागि समय मागेको थियो ।

परराष्ट्रले बुधबार विज्ञप्ति जारी गरी देउवाको भ्रमण कार्यक्रम सार्वजनिक गरेको छ । जसमा विभिन्न देशका सरकार तथा राष्ट्रप्रमुखसँग भेटवार्ता हुने उल्लेख छ ।

असार २९ मा प्रधानमन्त्रीमा नियुक्त भएयता देउवाले पहिलोपटक मोदीसँग भेट्न लागेका हुन् ।

देउवाले अघिल्लो महिना पार्टी सहमहामन्त्री प्रकाशशरण महतलाई दूतका रुपमा भारत पठाएका थिए । महतले प्रधानमन्त्री देउवाले चाँडै भारत भ्रमण गर्ने संकेत गरेका छन् ।

विश्वका विभिन्न मुलुकका शीर्ष नेता जलवायु सम्मेलनमा सहभागी हुन स्कटल्यान्डमा भेला हुँदैछन् ।

नेपाली टोलीको नेतृत्व गर्दै प्रधानमन्त्री देउवा शुक्रबार बेलायततर्फ उड्ने कार्यक्रम छ ।

देउवा बेलायत हुँदै स्कटल्याण्ड जाने तय भएको छ । यद्यपि बेलायती प्रधानमन्त्री बोरिस जोनसनसँग बेग्लै द्विपक्षीय भेटवार्ता नहुने परराष्ट्र अधिकारीहरुले बताए ।

बेलायत भ्रमणमा देउवाले नेपाल हेर्ने बेलायती सांसदको टोलीसँग साक्षात्कार गर्नेछन् । बेलायत-नेपाल सोसाइटी र त्यहाँस्थित ग्रैह्रआवसीय नेपालीलाई देउवाले सम्बोधन गर्ने कार्यक्रम छ ।

३१ तारिखका दिन बेलायतस्थित नेपाली कार्यवाहक राजदूत रोशन खनालले देउवाको सम्मानमा नेपाली दूतावासमा रिसेप्सन दिने कार्यक्रम छ । त्यसपछि देउवा नोभेम्बर १ तारिखका दिन ग्लास्गो पुग्नेछन् ।

देउवाले नोभेम्बर १ तारिखमा जलवायु परिवर्तनसम्बन्धी कोप २६ सम्मेलनमा मन्तव्य दिने कार्यक्रम छ ।

सम्मेलन उद्घाटनको बिहान बेलायती प्रधानमन्त्री बोरिस जोनसनले विभिन्न देशका सरकार तथा राष्ट्र प्रमुखलाई दिने ब्रेकफास्ट रिसेप्सनमा देउवा पनि सहभागी हुने कार्यक्रम छ ।

देउवा संयुक्त राष्ट्रसंघीय जलवायु परिवर्तन सम्मेलन अन्तर्गतको ‘वर्ल्ड लिडर्स समिट’पछि बेलायती प्रधानमन्त्रीले दिने रात्रिभोजमा सहभागी हुनेछन् ।

देउवाले नोभेम्बर ३ तारिखका दिन रोयल बोटानिक गार्डेन भ्रमण गरी त्यहाँस्थित नेपाली गार्डेनमा वृक्षारोपण गर्ने कार्यक्रम छ। उनले त्यहाँ सम्बोधन गर्नेछन् ।

प्रधानमन्त्री देउवा नोभेम्बर ३ मा स्वदेश फर्किने छन् । उनी नोभेम्बर ४ तारिखका दिन बिहान नेपाल आइपुग्ने तालिका छ ।