अखबार नेपाल ट्रेन्डिङ

काठमाडौं: मन्त्रीमा जानेको नाम टुंगो लगाउने नेकपा माओवादी केन्द्रको स्थायी कमिटी बैठक आज पनि बस्दै छ ।

बैठक दिउँसो ३ बजे पार्टी केन्द्रीय कार्यालय पेरिसडाँडामा बस्ने छ ।

बैठक सरकारमा पठाउने मन्त्रीहरुको नाम टुंगो लगाउने विषयमा केन्द्रित हुने बताइएको छ ।

आइतबारको स्थायी कमिटी बैठकपछि प्रवक्ता नारायणकाजी श्रेष्ठले सोमबारको बैठकले मन्त्रीको नाम टुंगो लगाउने र एक दुई दिनमै सरकारले पूर्णता पाउने बताएका थिए ।

आइतबारको बैठकमा अध्यक्ष पुष्पकमल दाहाल प्रचण्डले माधवकुमार  नेपाल समूह  तत्काल सरकारमा सहभागी नहुने र एमालेमै फर्किने सम्भावना देखिएको बैठकलाई ब्रिफिङ गरेका थिए ।

नेपाल समूह सरकारमा सहभागी नहुने भएपछि मन्त्रीको नाम टुंगो लगाएर मन्त्रिमण्डललाई पूर्णता दिन तयारीमा माओवादी लागेको हो ।

प्रधानमन्त्री शेरबहादुर देउवा नेतृत्वको सरकारमा माओवादीबाट जनार्दन शर्मा र पम्फा भुसाल सहभागी छन् । माओवादीको भागमा ७ वटा मन्त्रालय परेको बताइएको छ ।