अखबार नेपाल ट्रेन्डिङ

काठमाडौं: नेपाल सरकार र विप्लव समूहबीच कडा सुरक्षाका साथ वार्ता भइरहेको छ ।

हिजो एक चरण अनौपचारिक वार्ता गरेका दुवै पक्षका वार्ता टोली आज विहानैदेखि निरन्तर औपचारिक वार्तामा बसिरहेका छन् ।

स्रोतका अनुसार काठमाडौंकै एक सरकारी भवनमा कडा सुरक्षाका घेराबीच वार्ता भइरहेको जनाईएको छ ।

वार्ता स्थल गोप्य राखिएको छ । वार्ता भाँडिन सक्ने भएकाले एकैपटक निष्कर्षमा पुगेपछि मात्रै सार्वजनिक गर्ने तयारी गरिएको स्रोतको भनाइ छ ।

वार्तामा विप्लव समूहका मागमा छलफल भइरहेको छ । विप्लव समूहले प्रतिबन्ध फुकुवा हुनुपर्ने, पक्राउ परेका आफ्ना नेता कार्यकर्ता रिहा हुनुपर्ने लगायतका माग अघि सारेको छ ।

सरकारले हिजो गृहमन्त्री रामबहादुर थापाको संयोजकत्वमा प्रधानमन्त्रीका परराष्ट्र सल्लाहकार डाक्टर राजन भट्टराई सम्मिलित दुई सदस्यीय वार्ता टोली गठन गरेको थियो ।

त्यसलगत्तै विप्लव समूहले पनि प्रवक्ता खड्गबहादुर विश्वकर्मा प्रकाण्डको नेतृत्वमा उदयबहादुर चलाउने ‘दीपक’ सदस्य रहेको वार्ता समिति बनाएको थियो ।