अखबार नेपाल ट्रेन्डिङ

काठमाडौं: नेपाल कम्युनिष्ट पार्टी(नेकपा) अहिले दुई भागमा विभाजित भएर आ-आफ्नो गन्तव्य शुरु गरिरहँदा अन्तर्राष्ट्रिय स्तरबाट चासो लिने काम तीव्र बनिरहेको छ ।

यसरी चासो बढेसँगै नेकपाभित्रको समस्या बुझ्नको लागि नेपालमा पहिलोपटक चिनियाँ पक्षबाट राजनीतिक भेटघाटलाई तीव्रता दिने भएको छ । जसको लागि आज चीनियाँ कम्युनिस्ट पार्टीको अन्तर्राष्ट्रिय विभागका उपमन्त्री कुओ येचौ नेतृत्वको एक उच्चस्तरीय प्रतिनिधिमण्डल काठमाडौं आउँदैछन् ।

उनीहरुले दुबै नेकपाका नेताहरुसँग पार्टी विभाजनको लागि भएका समस्याका बारेमा छलफल गर्ने बताईएको छ । उपमन्त्री कुओ नेतृत्वको टोलीले राष्ट्रपति विद्यादेवी भण्डारी, प्रधानमन्त्री केपी शर्मा ओली, नेकपाको एक समूहका अध्यक्षद्वय पुष्पकमल दाहाल, माधवकुमार नेपाललगायत नेतासँग भेटवार्ता गर्ने कार्यक्रम रहेको छ । उनीहरु चार दिन काठमाडौमा रहने बताईएको छ ।

नेकपा विभाजनपछि चिनियाँ कम्युनिस्ट पार्टीका तर्फबाट नेपाल आउन लागेको कुओ नेतृत्वको यो उच्चस्तरीय भ्रमण टोली हो । उनीहरुले नेकपालाई के सन्देश दिन्छन भन्ने आम चासोको विषय भएको छ ।

चीनले नेपालमा स्थिरता, सुशासन र विकासका लागि नेकपाको झन्डै दुईतिहाइ जनमतको सरकार आफ्ना लागि पनि भरपर्दो शक्ति हुने विश्वाससाथ सम्बन्ध विकास गरेर लैजान चाहेको थियो । सोही कारण पनि नेकपाभित्रको विवादलाई उसले सोहीअनुसार नै हेर्दै आएको थियो । विवाद मिलाउन उसले यो बीचमा निकै मिहिनेत पनि गरेको थियो। तर चीनको प्रयास सफल भएन । नेकपा फुटेरै छाड्यो ।

पार्टी फुटको नजिक पुगेको चाल पाएपछि नेपालका लाथि चिनियाँ राजदूत होओ यान्छीले नेकपाका नेताहरुसँगको भेटेरै कुरा गरेकी थिईन । त्यसबिचमा यान्छीले राष्ट्रपति विद्यादेवी भण्डारी, नेकपाका अध्यक्षद्वय पुष्पकमल दाहाल, माधवकुमार नेपाल, स्थायी समिति सदस्यहरू वर्षमान पुनदेखि कृष्णबहादुर महरासम्म भेट गरेकी थिइन् । तर भेटले कुनै सार्थकता पाउन सकेन ।