कात्तिक २७ गते बिहीवार नेकपाको सचिवालय बैठक बोलाउन ओलीलाई दाहालको प्रस्ताव
वि.सं.२०७७ कात्तिक २६ बुधवार ०७:४०
काठमाडौं: नेपाल कम्युनिष्ट पार्टी (नेकपा)को सचिवालयको बैठक यही कात्तिक २७ गते राख्न कार्यकारी अध्यक्ष पुष्पकमल दाहालले प्रस्ताव राखेका छन् ।
मंगलबार बालुवाटार पुगेर अध्यक्ष तथा प्रधानमन्त्री केपी शर्मा ओलीसँग उक्त मितिमा बैठक राख्न प्रस्ताव गरेको प्रवक्ता नारायणकाजी श्रेष्ठले जानकारी दिए ।
तर, प्रधानमन्त्री तथा अध्यक्ष ओली भने सचिवालय बैठक बोलाउने कुरामा सहमत भइनसकेको प्रवक्ता श्रेष्ठको भनाइ छ ।
पार्टी मुख्यालय धुम्बाराहीमा मंगलबार बसेको बहुमत सचिवालय सदस्यको अनौपचारिक बैठकमा उक्त दिनसम्म कुर्ने निर्णय भएको छ ।
प्रधानमन्त्री ओली बुधबार किमाथांका जाने भएकाले २७ गते बिहीबार सचिवालय बैठक बोलाउन अध्यक्ष दाहालले प्रस्ताव गरेको पार्टी प्रवक्ता श्रेष्ठले जानकारी दिए ।
यसअघि, कात्तिक २२ गतेपनि पार्टी अध्यक्ष दाहाल, झलनाथ खनाल, माधवकुमार नेपाल, वामदेव गौतम र नारायणकाजी श्रेष्ठले पार्टी मुख्यालय धुम्बाराहीमै अनौपचारिक छलफल गरी सचिवालय बैठक राख्न लिखित रूपमै अध्यक्ष ओलीसँग माग गरेका थिए ।
वि.सं.२०७७ कात्तिक २६ बुधवार ०७:४०