अखबार नेपाल ट्रेन्डिङ

काठमाडौं: काठमाडौ उपत्यका नगरपालिका फोरमले अति आवश्यक बाहेकका सेवा प्रवाह आगामी तीन हप्ताका लागि बन्द गरेको छ ।

राजधानी काठमाडौंमा संक्रमण दर बढ्दै गइरहेको बेला जोखिम थप बढ्न नदिन उपत्यकाका स्थानीय तहहरुको संयुक्त संयन्त्र उपत्यका नगरपालिका फोरमले स्थानिय तहबाट प्रवाह गर्दै आएको अति आवश्यक बाहेका सेवा प्रवाह आगामी तीन साताका लागि बन्द गराएको हो ।

यस्तै नगरपालिका फोरमले उपत्यकाभित्र भदौ १५ गतेसम्मका लागि सार्वजनिक यातायात सञ्चालनमा रोक लगाउन र नीजि सवारीमा जोर-बिजोर प्रणाली लागू गर्न सरकारसँग माग गरेको छ ।

उपत्यका नगरपालिका फोरमले हिजो मात्रै कोभिङ-१९ संकट व्यवस्थापन केन्द्र (सीसीएमसी)का संयोजकसमेत रहेका उपप्रधानमन्त्री तथा रक्षामन्त्री ईश्वर पोखरेलसँग रक्षा मन्त्रालयमा छलफल गरी कोरोना रोकथाम तथा नियन्त्रणका उपायबारे सुझाव दिएको थियो ।

स्थानीय तहले क्वारेन्टाइन र आईशोलेसन सेन्टरको सञ्चालन र थप निर्माण गर्नुपर्ने दवाव आइरहेको बेला फोरमले एकीकृत करेन्टीन संघीय सरकारले सञ्चालन गर्ने स्थानीय तहले त्यसको ब्यवस्थापनमा सहयोगीको भूमिका निर्वाह गर्ने प्रस्ताव गरेको छ ।

कलकारखानमा र उद्योग धन्दा ब्यापारिक क्षेत्र होटेलहरुमा मापदण्डको प्रभावकारी पालनामा जोड दिंदै फुटपाथ ठेला गाडा र साइकल व्यापरलाई भने भाद्र १५ सम्म निषेध गर्नुपर्ने सुझाब दिएका छन् ।

कोभिड-१९ को संक्रमण फैलनसक्ने खतरालाई ध्यानमा राखी सरकारको समर्थन वा विरोधमा र्‍याली, भेला, अनसन, जुलुस लगायतका गतिविधि गर्न कडाईका साथ निषेध गरिनुपर्ने तथा भिड हुने साँस्कृतिक गतिविधि जात्रा पर्व सञ्चालनमा पनि रोक लगाउन समेत बैठकले अनुरोध गरेको छ ।