अखबार नेपाल ट्रेन्डिङ

काठमाडौं: कालीगण्डकी गाँउपालिका ४ बिर्घास्थित खहरेमा पहिरोमा परी पूर्व अध्यक्ष सहित ३ जनाको मृत्यु भएको छ ।

मंगलबार बिहान झरेको पहिरोमा परी साविक बिर्घा गाविसका अध्यक्ष ६५ बर्षिय इमानसिंह राना, ६० बर्षिय जमानसिंह थापा र ५० बर्षिय टिकाबहादुर थापाको निधन भएको कालीगण्डकी गाउँपालिका अध्यक्ष खिमबहादुर थापाले जानकारी दिएका छन् ।

पहिरोमा परी ६० बर्षीय प्रेमचन्द्र पाण्डे वेपत्ता रहेका छन् भने घाईते भएका वडा सदस्य ६८ बर्षीय हुमनाथ पाण्डे र ५५ बर्षिय विरवहादुर थापालाई थप उपचारका लागि पाल्पास्थित मिशन हस्पिटल पुर्याइएको छ ।

प्रहरी, सेना र सशस्त्र प्रहरीको समूह घटनास्थल पुगेको स्थानीयबासीको सहयोगमा घाइते र वेपत्ताको खोजी तथा जोखिममा रहेका ४ घर परिवारलाई सुरक्षित स्थानमा स्थानान्तरण गरिएको थापाले जानकारी दिएका छन् ।