अखबार नेपाल ट्रेन्डिङ

काठमाडौं: कोरोना भाइरसको संक्रमण देखिएका नेपाली सेनाको मध्यपूर्वी पृतनाका पृतनापति र एक जना चिकित्सकलाई उपचारका लागि काठमाडौं पठाइएसँगै त्यहाँको ब्यारेक सिल गरिएको छ ।

महोत्तरीको बर्दिवास नगरपालिकाको किसान नगरमा अवस्थित मध्यपूर्वी पृतनाका पृतनापति ५२ वर्षीय उपरथी र सेनाका एमबीबीएस डाक्टरमा शनिबार संक्रमण पुष्टि भएपछि सेनाको ब्यारेक सिल गरेर अन्य कर्मचारीहरुको स्वाब संकलन भैरहेको छ । पृतनापति र चिकित्सकमै कोरोना देखिएपछि अवस्थित मध्यपूर्वी पृतनाको ब्यारेक सिल गरिएको छ, ब्यारेकभित्रका कुनै पनि सेनालाई बाहिर आउन वा हिँडडुल गर्न प्रतिबन्ध लगाइएको छ ।

सो ब्यारेकभित्र करिब दुई हजार सैनिक कर्मचारी रहेका छन् । तर नेपाली सेनाले भने यो विषयमा कुनै आधिकारिक धारणा सार्वजनिक गरेको छैन । पृतनापति र उक्त चिकित्सकको सम्पर्कमा ब्यारेकभित्र नै धेरै सैनिकहरु आएको कारण पनि ब्यारेकभित्र त्रासको अवस्था सिर्जना भएको हो । ब्यारेकभित्र अस्पताल, विद्यालय समेतका संरचनाहरू निर्माणाधिन रहेको छ ।

उक्त ब्यारेकभित्र एक गण, एक गुल्म, सिग्नल गण, मेडिकल गण, बिद्यालय गणसहित पृतनाका समेत रहेका कारण अहिले ब्यारेक वरिपरि सशस्त्र प्रहरी र नेपाल प्रहरीले कसैलाई पनि जान दिएको छैन ।