अखबार नेपाल ट्रेन्डिङ

काठमाडौं: सरकारले आज आर्थिक वर्ष २०७७/७८ का लागि नीति तथा कार्यक्रम संघीय संसदमा पेश गर्दैछ । आज अपराह्न बस्ने संघीय संसदको संयुक्त बैठकमा राष्ट्रपति विद्यादेवी भण्डारीले सरकारको नीति तथा कार्यक्रम प्रस्तुत गर्ने छिन् । यसका लागि प्रतिनिधिसभा र राष्ट्रियसभाको संयुक्त बैठक अपराह्न ४ बजे संसद भवन नयाँ वानेश्वरमा बोलाइएको छ ।

कोरोना भाइरसको संक्रमणको त्रासका कारण बैठक कक्षमा सामाजिक दूरी कायम हुने बस्ने व्यवस्था मिलाइएको संघीय संसद सचिवालयले जनाएको छ । संयुक्त बैठकमा प्रतिनिधिसभामा २ सय ७५ र राष्ट्रियसभामा ५९ सांसद सहभागी हुनेछन् । कार्यक्रममा अतिविशिष्ट, विशिष्ट गरी करिव २९ पाहुनालाई आमन्त्रण गरिएको संसद् सचिवालयले जनाएको छ । उपराष्ट्रपति, संवैधानिक निकायका प्रमुख, पूर्वप्रधानमन्त्री, प्रधानसेनापति लगायत विशिष्ट व्यक्ति पनि बैठकमा सहभागि हुनेछन् ।

सत्तारुढ नेकपा नेतृत्वको सरकारले संसदमा तेस्रो पटक नीति तथा कार्यक्रम ल्याउन लागेको हो । यसपटक कोरोना संक्रमणको चपेटमा अर्थव्यवस्था परेकाले यसैलाई केन्द्रित गरी नीति तथा कार्यक्रम ल्याइदैछ । आज नीति तथा पेश गर्ने सरकारले संविधान अनुसार आउँदो जेठ १५ गते आगामी आर्थिक वर्षको बजेट ल्याउने छ ।