अखबार नेपाल ट्रेन्डिङ

काभ्रेः ट्रिपरको ठक्करबाट आमाछोरीकै मृत्यु भएपछि स्थानीयवासी आन्दोलित हुँदा काभ्रेको पनौती नगरपालिकाको चार किल्लामा अनिश्चित कालको लागि कर्फ्यु आदेश जारी गरेको छ । बिहान ९ बजेदेखि कर्फ्यू लगाइएको जिल्ला प्रशासन कार्यालय काभ्रेले जनाएको छ ।

सोमबार साँझ ट्रिपरले आमाछोरीलाई ठक्कर दिँदा मृत्यु भएपछि स्थानीयवासीले सडक अवरुद्ध गरेका थिए । बा ५ ख ५४८० नम्बरको ट्रिपरको ठक्करबाट खानीखोला-१ की ३३ बर्षीय जुनीमाया गोले र उनकी ३ बर्षीय छोरी स्मारिका गोलेको मृत्यु भएको थियो । प्रहरी र स्थानीयवासीबीच झडप हुँदा १९ राउण्ड अश्रुग्याँस तथा केही रबरको गोली समेत चलाएको थियो ।

झडपमा परि आधा दर्जन प्रदर्शनकारी तथा ३ जना प्रहरी घाइते भएका थिए । स्थानीय दिलिप बूढाथोकीको देव्रे पाखुरामा र हर्कबहादुर लामा तथा अर्का स्थानीयलाई गोलीको छर्रा लागेको छ । उनीहरु र घाइते प्रहरीको शिर मेमोरियल अस्पतालमा उपचार भैइरहेको प्रहरी उपरीक्षक रविराज पौडेलले जानकारी दिए ।