अखबार नेपाल ट्रेन्डिङ

काठमाडौ: सरकारले काठमाडौं उपत्यकामा निषेधाज्ञा सहितको लकडाउन गरेको लगभग ६ महिनापछि केही हदसम्म खुकुलो पारेको छ ।

यस अवधिमा विशेषगरी श्रम गरी खाने श्रमिकहरु निकै मारमा परेको समाचारहरु पढ्न र सुन्न पाइयो ।

सरकारले गरेको एक्कासी लकडाउनको कारणले कतिपय श्रमिकहरु भोकभोकै बस्नु परेको र कतिपय श्रमिकहरुले रोजगारी समेत गुमाउनु परेको गुनासो जनमानसमा आयो ।

यस्तो विषम परिस्थितिमा पनि सरकारले उनीहरुप्रति कुनै सहज कदम नचालेको र कुनै पनि जिम्मेवारी नदेखाएको कारण संयुक्त रुपमा सातौं ट्रेड युनियन महासंघले माइतिघर मण्डलामा सरकारविरुद्ध आक्रोषित हुँदै नाराबाजी गरेका थिए ।

यस आन्दोलन कार्यक्रममा विभिन्न ट्रेड युनियन महासंघका प्रतिनिधी वक्ताहरुले सरकारको कमजोरीको खण्डन गर्दै आ–आफ्नो भनाई राखेका थिए ।

यसै कार्यक्रममा नेकपा (माओवादी केन्द्र)को भातृ संगठन क्रान्तिकारी ट्रेड युनियन महासंघ नेपालका अध्यक्ष राजन तिमिल्सिनाले भने– यो एउटा सांकेतिक विरोध कार्यक्रम मात्रै हो ।

यदि सरकारले श्रमिकहरुलाई यसरी नै बेवास्ता गर्ने काम गरिरहने हो भने अझ सशक्त रुपले फेरि सरकारलाई घुँडा टेकाउने गरी आन्दोलनको आँधीबेरी गर्नेछौँ ।

यस विरोध कार्यक्रममा सहभागी अन्य जनताहरुले सरकारले यसरी भोकभोकै लकडाउनको निहु गरेर घरभित्रै थुन्ने काम उचित नभएको तर्कहरु राखे ।

यो कोरोना (COVID-19) महामारी भएको अवस्थामा ‘के विरोध कार्यक्रम नै गर्नु सहि हो र’ भन्ने सञ्चारकर्मीहरुको प्रश्नमा श्रमिकहरु ‘रोगले होइन भोक र शोकले मर्न आँटेको’ भन्ने धेरैको जनगुनासो थियो ।

के साँच्चै सरकारले श्रमिकहरुलाई मात्रै नभएर नेपाली जनताहरुलाई नै बेवास्ता गरेकै हो त ?