अखबार नेपाल ट्रेन्डिङ

रामेछाप: रामेछापमा सत्ता गठबन्धनबीच चुनावी तालमेल नहुने निश्चित भएको छ । औपचारिक रुपमा नै कांग्रेसले माओवादीसँग चुनावी तालमेल नगर्ने घोषणा गरेको छ ।

सत्ता गठबन्धनबीच चुनावी तालमेल नहुने भएसँगै एमाले उत्साहित भएको छ । सत्ता गठबन्धन हुँदा चुनावी केही स्थानीय तह गुमाउने हिसाब निकालेको एमाले रामेछापले चुनाब जित्नेमा ढुक्क देखिएको छ ।

कांग्रेसले ८ वटै स्थानीय तहमा एक्लै लडने गरी उम्मेदवार छनोटको प्रक्रिया अघि बढाएको छ । कांग्रेसले ६ वटा स्थानीय तहमा जित्ने आँकलन गरेको छ ।

गत स्थानीय तहको निर्वाचनमा पाँच वटा स्थानीय तहमा निर्वाचन जितेको एमाले यस पटक थप एक स्थानीय तह थपेर ६ वटा पुर्याउने दावी गरेको छ ।

गठबन्धन हुँदा एमालेले मन्थली नगरपालिका, रामेछाप नगरपालिका जित्नको सहज नहुने अनुमान गरेको थियो ।

तर सत्ता गठबन्धन नहुने भएपछि एक्लै चुनावी जित्ने आधार बनेको एमालेले निष्कर्ष निकालेको छ ।

८ वटा स्थानीय तह र ६४ वटा वडा रहेको रामेछापमा गत स्थानीय तहको निर्वाचनमा कांग्रेसले रामेछाप नगरपालिकासहित १३ वटा वडामा निर्वाचन जितेको थियो ।

कांग्रेसले एमाले विभाजित भएको र माओवादीको सांगठानिक अवस्था कमजोर भएको हिसाब निकाल्दै ६ वटा स्थानीय तह जित्ने हिसाब निकालेको छ ।

तर दावी गरेजस्तो गरी चुनाव जित्नेमा कांग्रेस ढुक्क भने देखिएको छैन् । कांग्रेसलाई १३ वडाबाट बढाएर ४० वटा वडा जित्न त्यति सहज नरहेको बताइएको छ ।

गत स्थानीय तहको निर्वाचनमा सबै स्थानीय तहमा दोस्रो भएको तथ्याङकलाई आधार बनाएर पनि कांग्रेसले जित्ने दावी गरेको छ ।

त्यसैगरी गत स्थानीय तहको निर्वाचनमा रामेछापको सुनापति र दोरम्बा शैलुङ गाउँपालिका जितेको माओवादी पनि दावी गरेको थप तीन वटा स्थानीय तहको निर्वाचन जित्नेमा ढुक्क देखिएको छैन ।

विगतमा जितको दुई स्थानीय तह जित्ने हिसाब निकालेको माओवादीले खाँडादेवी गाउँपालिका, मन्थली नगरपालिका र रामेछाप नगरपालिका जित्ने दावी गरेको छ ।

गत निर्वाचनमा २३ वटा वडा जितेको माओवादीले आगामी निर्वाचनमा ३३ वटा वडा जित्ने आँकलन गरेको छ ।

कांग्रेस र माओवादीको अडानको कारण चुनावी तालमेल हुन नसकेकोप्रति नेकपा एकीकृत समाजवादी घमण्डको कारण दुवै पार्टी हार्ने अवस्थामा पुगेको निष्कर्ष निकालेको छ ।