अखबार नेपाल ट्रेन्डिङ

एजेन्सीः इजरायलले इरानका कम्तीमा १४ जना परमाणु वैज्ञानिकको हत्या गरेको खुलेको छ । एसोसिएटेड प्रेस (एपी) समाचार एजेन्सीका अनुसार १२ दिन लामो युद्धका क्रममा इजरायलले १४ जना इरानी वैज्ञानिकको ज्यान लिएको हो । इरानले ती वैज्ञानिकमाथि लक्षित आक्रमण गरेर हत्या गरेको एपीले उल्लेख गरेको छ । मारिएका ती वैज्ञानिकमा रसायनशास्त्री, भौतिकशास्त्री र इन्जिनियर समेत छन् ।

एपीका अनुसार यो दाबी फ्रान्सस्थित इजरायली राजदूत जोशुआ जार्काले गरेका हुन् । जार्काका अनुसार यी हत्या घटनाले इरानको बाँकी रहेको आणविक पूर्वाधार तथा सामग्री प्रयोग गरेर हतियार निर्माण गर्न ‘लगभग असम्भव’ बनाइदिएको छ । ‘पूरै समूह नै सकिनुको अर्थ के हो भने यो कार्यक्रमलाई धेरै वर्ष पछाडि धकेलिएको छ’, जार्काले भनेका छन् । एपीका अनुसार जार्काले सोमबार त्यसबारे बताएका हुन् । त्यसको भोलिपल्ट मंगलबार, इरानी टेलिभिजनले आणविक वैज्ञानिक मोहम्मद रेजा सेदिघी साबेर इजरायली आक्रमणमा मारिएको पुष्टि गरेको छ । उनी जुन १३ मा भएको हमलामा घाइते भएका थिए, जसमा उनका १७ वर्षीय छोराको मृत्यु भएको थियो ।

जार्काको दाबीका बाबजुद विश्लेषकले भन्छन्, ‘इरानसँग अझै अन्य वैज्ञानिक रहेका जनाएका छन् । ती वैज्ञानिकले मारिएका व्यक्तिको स्थान लिन सक्छन् । यी हत्याका घटनाले इरानको आणविक कार्यक्रमलाई केही समयका लागि ढिलो अघि बढाउन सक्छ, तर उसले आफ्नो कार्यक्रमलाई पूरै बन्द नगर्ने बताइसकेको छ ।