अखबार नेपाल ट्रेन्डिङ

काठमाडौं: छिमेकी मुलुक भारतमा तेस्रो लहरको कोरोना भाइरसको संक्रमित लगातार बढ्न थालेका छन् ।

दैनिक संक्रमितको संख्या झण्डै साढे २ लाख पुग्न लागेको छ ।

भारतमा पछिल्लो २४ घण्टामा २ लाख ४७ हजार ४ सय १७ जना नयाँ संक्रमित थपिएका छन् ।

जुन संख्या मंगलबारको तुलनामा २७ प्रतिशतले बढी हो ।

योसँगै भारतमा कोरोनाको कहर गत मे महिनाको अवस्थामा पुगेको छ ।

भारतमा १० दिनको अवधिमा कोरोना संक्रमितको संख्या ६ गुणाले बढेको भारतीय समाचार माध्यमले जनाएका छन् ।

पछिल्लो २४ घण्टामा मुलुकभर ८४ हजार ८ सय २५ जना निको भएको र ३ सय ८० जनाको मृत्यु भएको पनि समाचारमा उल्लेख छ ।

हाल भारतमा सक्रिय संक्रमितको संख्या बढेर ११ लाख १७ हजार ५ सय ३१ पुगेको छ भने दैनिक पोजिटिभिटी दर १३.११ प्रतिशत पुगेको छ ।

त्यस्तै, कोरोना भाइरसको नयाँ ओमिक्रोन भेरियन्टबाट संक्रमित हुनेको संख्या ५ हजार ४ सय ८८ पुगेको छ ।

ओमिक्रोनका संक्रमितमध्ये महाराष्ट्रमा सबैभन्दा धेरै अर्थात् १ हजार ३ सय ६७ रहेका छन् । दोस्रो स्थानमा रहेको राजस्थानमा ओमिक्रोनबाट हालसम्म ७ सय ९२ जना संक्रमित भएका छन् ।

यस बाहेक, दिल्लीमा ५ सय ४९, कर्नाटकमा ४ सय ७९, पश्चिम बंगालमा २ सय ९४ र उत्तर प्रदेशमा २ सय ७५ जनामा यो भेरियन्टको संक्रमण पुष्टि भएको छ ।