अफगानिस्तानलाई पाकिस्तानले गर्यो मानवीय सहयोगको घोषणा
वि.सं.२०७८ मंसिर ८ बुधवार १५:४१
1.9K
shares
एजेन्सीः पाकिस्तान सरकारले अफगानिस्तानलाई २ करोड ८० लाख डलर बराबरको मानवीय सहयोगको घोषणा गरेको छ ।
प्रधानमन्त्री इमरान खानले सेना प्रमुख क्वामर जाभेद वाजवा, मन्त्रीहरु, राष्ट्रिय सुरक्षा सल्लाहकार लगायत सरकारका उच्च पदस्थ अधिकारीहरुसँगको भेटपछि अफगानिस्तानलाई मानवीय सहयोगको घोषणा गरेका हुन् ।
‘प्रधानमन्त्री खानले २ करोड ८० लाख डलर बराबरको मानवीय सहायताका सामग्री तत्काल अफगानिस्तानमा ढुवानी गर्न निर्देशन दिएका छन्,’ सरकारले जारी गरेको विज्ञप्तिमा भनिएको छ ।
पाकिस्तानले ५० हजार मेट्रिक टन गहुँ, आपतकालीन मेडिकल उपकरण र जाडोमा प्रयोग हुने कम्मल लगायतका सामग्री अफगानिस्तानमा पठाउन लागेको हो ।
पछिल्लो समयमा पाकिस्तान सरकारले आफ्नो देशबाट अफगानिस्तान निर्यात हुने निश्चित सामाग्रीको शुल्क समेत घटाएको छ । भारतले मानवीय सहायतास्वरुप अफगानिस्तान पठाएको ५० हजार मेट्रिक टन गहुँ ढुवानीका लागि अनुमति दिने पनि पाकिस्तानले जनाएको छ ।
भारत सरकारले यही ११ नोभेम्बरमा सो सहयोगको घोषणा गरेको थियो । अफगानिस्तानमा सामान ढुवानीमा पाकिस्तानी पक्षबाट अवरोध भएको भारतीय विदेश मन्त्रालयलले गुनासो गरेको थियो ।
गत १५ अगस्टमा तालिवानले सत्ता कब्जा गरेपछि उपचार गर्न आएका केही अफगानी भारतमा बिचल्लीमा छन् ।
वि.सं.२०७८ मंसिर ८ बुधवार १५:४१




















