अखबार नेपाल ट्रेन्डिङ

एजेन्सीः अमेरिकी सुरक्षा तथा गुप्तचर एजेन्सी एफबीआईले गत साता अमेरिकाको संसद भवन क्यापिटल हिलमा आक्रमण गर्नेमध्ये १७० जनाको पहिचान भएको जानकारी गराएको छ ।

एफबीआईका अनुसार तीमध्ये ७० जनाबिरुद्ध मुद्धा दायर गरिसकिएको छ । एफबीआईले संसद भवनमा आक्रमण गर्नेहरुका लागि एक लाखभन्दा बढी डिजिटल सुराक मानिसहरुले पठाएको जनाएको छ ।

एफबीआईले संसद भवनमा आक्रमण गर्नेहरु आफैं आएर आत्मसमर्पण गर्न भनेको छ । ‘यदि तपाईंहरु वाशिंटन छाडेर गइसक्नुभएको छ भने पनि हाम्रा एजेन्टले खोजेर निकाल्नेछन्,’ एफबीआईले भनेको छ ।

संसद भवनमा भएको आक्रमण राष्ट्रपति डोनाल्ड ट्रम्प समर्थित जत्थाबाट भएको आरोप लाग्दै आएको छ । मंगलबार मेक्सिकोको सीमामा लगाएको पर्खालको निरीक्षण गर्न टेक्सास पुगेका ट्रम्पले आफूले योभन्दा अगाडि अभिव्यक्ति स्वतन्त्रता हनन् भएको कहिल्यै नदेखेको बताएका छन् ।

राष्ट्रपति ट्रम्पलाई महाअभियोग लगाउने विषयमा सिनेटमा छलफल भइरहेका बेला ट्रम्पले आफ्नो अभिव्यक्ति जायज भएको दावी गरेका छन् ।