अखबार नेपाल ट्रेन्डिङ

काठमाडौं: विश्वभर महामारीको रुपमा फैलिएको कोरोना भाइरसको महामारीबाट २ लाख ६ हजारभन्दा बढीको मृत्यु भएको छ भने करिव ३० लाख नजिक मानिस संक्रमित भएका छन् । विश्वका २ सय १० मुलुक र २ वटा पानीजहाजमा फैलिएको कोरोना भाइरसको संक्रमणबाट मृत्यु हुनेको संख्या २ लाख ६ हजार ९ सय ९० पुगेको छ ।

पछिल्लो २४ घण्टामा संक्रमणबाट विश्वभर ३ हजार ७ सय ५१ जनाको मृत्यु भएको छ भने ७३ हजार ८ सय ५८ जना संक्रमित भएका छन् । संक्रमित हुनेको कुल संख्या २९ लाख ९४ हजार ७ सय ६१ पुगेको छ । कोरोना भाइरसको महामारीबाट सबै भन्दाबढी बढी प्रभावित अमेरिकामा मृत्यु हुने मानिसको संख्या ५५ हजार नाघेको छ । अमेरिकामा मृत्यु हुनेको संख्या ५५ हजार ४ सय १३ पुगेको हो ।

ईटालीमा आइतबार थप २ सय ६० जनाको मृत्युभएपछि मृतकको संख्या २६ हजार ६ सय ४४ पुगेको छ । यस अघि शनिबार त्यहाँ ४ सय १५ जनाको मृत्यु भएको थियो । संक्रमितको संख्यामा भने खासै सुधार हुन सकेको छैन । शुक्रबार २ हजार ३ सय ५७ जना नयाँ संक्रमित देखिएकोमा पछिल्लो २४ घण्टामा पनि त्यहाँ २ हजार ३ सय २४ जना नयाँ संक्रमित थपिएका छन् । योसँगै संक्रमित हुने मानिसको संख्या १ लाख ९७ हजार ६ सय ७५ पुगेको छ ।

स्पेनमा कुल संक्रमित २ लाख २६ हजार ६ सय २९ पुगेको छ । स्पेनमा पछिल्लो २४ घण्टामा कोरोना भाइरसले २ सय ८८ जनाको मृत्यु भएको छ भने २ हजार ८ सय ७० जना नयाँ संक्रमित थपिएका छन् । त्यहाँ मृतक र संक्रमित दुबै कम भएको छ । यसअघि शनिबार संख्या ३ सय ७८ जनाको मृत्यु भएको थियो भने ३ हजार ९ सय ९५ जना नयाँ संक्रमित थपिएका थिए ।

फ्रान्समा कोरोना भाइरसको संक्रमणले पछिल्लो २४ घण्टामा २ सय ४२ जनाको मृत्यु भएको छ । योसँगै त्यहाँ मृतकको संख्या २२ हजार ८ सय ५६ पुगेको छ ।

बेलायतमा कोरोना संक्रमणबाट मृत्यु हुनेको संख्या २० हजार ७ सय ३२ पुगेको छ । कोरोना भाइरसका कारण युरोपियन मुलुकहरुमा १ लाख २१ हजार ८ सय ८५ जना, उत्तर अमेरिकी मुलुकहरुमा ५९ हजार ९ सय ५५ जनाको मृत्यु भएको छ ।