अखबार नेपाल ट्रेन्डिङ

काठमाडौं: गायक विजय थापाको स्वरमा रहेको ‘शिव शंकर’भजनको म्यूजिक भिडियो छायांकन सम्पन्न भई चाँडै आम दर्शक माझ आउने प्रक्रियामा रहेको गायक थापाले जानकारी दिएका छन् ।

सिन्चुरी सुरेश धमालको रचनामा रहेको भजनलाई महेश ज्ञवालीले संगीत भरेका छन् । उक्त भजनको छायांकन श्री केदारनाथको शिर डोलेश्वर महादेव मन्दिरमा गरिएको छ । गीतको रचनाकार धमालको समेत अभिनय रहेको उक्त भजनको छायांकनको क्रममा उनले भजनको भाव अनुसार डोलेश्वर महादेव उपयुक्त रहेको र सोहि अनुसार छायांकन भएकोमा आफु उत्साहित रहेको बताए ।

त्यस्तै गायक थापाले भजन दर्शनार्थी भक्तजनहरुका लागि अत्यन्तै प्रिय हुने भएकोले यो भजन आम सर्वसाधारणहरुको जनजिब्रोमा गुञ्जिरहनेमा आफु विश्वस्त रहेको बताए । भजनका संगीतकार महेश ज्ञवालीले यो भजनको मेलोडि अत्यन्तै सरल रहेको र चाँडै नै आम सर्वसाधारणको मन मस्तिष्कमा रहन सफल हुनेमा कुनै दुईमत नरहेको प्रतिक्रिया दिए ।

शिवको वर्णन सहित अभिनय गरेका देव सरकारले यो भजन अत्यन्तै कर्णप्रिय रहेको र यो भजनमा आफुले अभिनय गर्न पाउँदा अत्यन्तै रमाईलो र आनन्द आएको प्रतिक्रिया दिए । भजनको भिडियो परिकल्पना ईन्द्र लामाले गरेका छन् भने भिडियोको निर्देशन/छायांकन/सम्पादन सुबास मुखिया सुनुवारले गरेका छन् । भजनको संगीत संयोजन संजय हमालले गरेका हुन भने अजय देव अधिकारले रेकर्डिङ गरेका हुन् । भजनको मिक्स माष्टर गोविन्द सोनीको रहेको छ ।