अखबार नेपाल ट्रेन्डिङ

बिराटनगर: निर्वाचन प्रमुख आयुक्त दिनेशकुमार थपलियाले निर्वाचनको ‘रकेट’ छुटिसकेकाले तोकिएकै समयमा निर्वाचन हुने बताएका छन् ।

उनले यो निर्वाचनको रकेटलाई गन्तव्यमा पुर्‍याउन नसके दुर्घटना हुने बताएका हुन । आज विराटनगरमा आयोजित मिडिया अभिमुखीकरण कार्यक्रममा बोल्दै थपलियाले यस्तो बताएका हुन् ।

उनले कार्यक्रममा बोल्दै भने ‘गाडी छुटेको होइन, प्लेन छुटेको होइन, बरु रकेट प्रक्षेपण भएको हो । अब यसको दिशा बदल्न वा रोक्न सकिंदैन’, उनले भने, ‘निर्वाचन रोकिए दुर्घटना हुन्छ । आयोग दुर्घटना घटाउन चाहँदैन ।’

प्रमुख आयुक्त थपलियाले निर्वाचन हुँदैन भन्ने कुनै शंका नराख्न आग्रह गर्दै ३५ जिल्लाको मतपत्र छाप्ने काम सकिएको, निर्वाचन अधिकृत चयन कार्य पूरा भएको जानकारी दिएका छन् ।

अब मतदाता अभिमुखीकरण समेत शुरु हुने अवस्था भइसकेकाले निर्वाचन रोक्ने कुराको कल्पना गर्न नसकिने उनको भनाइ छ ।

निर्वाचन सम्पन्नताका लागि राजनीतिक दलको अहम् भूमिका रहने बताउँदै उनले सञ्चारमाध्यमलाई उपयुक्त भूमिका खेल्न आग्रह गरेका छन् ।