अखबार नेपाल ट्रेन्डिङ

काठमाडौं: कुमारी बैंकले नेपाल क्रेडिट एण्ड कमर्स (एनसीसी) बैंकलाई गाभेर पुस १७ गतेबाट एकीकृत कारोबार गर्ने भएको छ ।

कुमारी बैंकका प्रमुख कार्यकारी अधिकृत रामचन्द्र खनालले आगामी आइतबारदेखि एकीकृत कारोबार गर्ने तयारी रहेको जानकारी दिए । मर्जरपछि बैंकको नाम कुमारी बैंक नै हुने छ ।

बैंकको प्रधान कार्यालय टंगालमा हुने छ । एकीकृत कारोबार थाल्दा दुबै बैंकको नजिक-नजिक रहेका केही शाखा बन्द गरिने छन् । कुल शाखा संख्या ३५५ हुन्छ । यसमध्ये ५८ स्थानमा शाखा नजिक-नजिक छन् ।

दुई बैंक गाभिएपछि चुक्ता पुँजी २५ अर्ब ८५ करोड हुनेछ । बैकको निक्षेप ३ खर्ब ११ अर्ब ३४ करोड निक्षेप हुनेछ भने कर्जा २ खर्ब ७४ अर्ब ५५ करोड हुनेछ । जगेडा कोषहरुमा भएको रकम लगायतका आधारमा बैंकको कुल पुँजी ३७ अर्ब ६५ करोड हुनेछ ।

मर्जरपछि बैंकको प्रमुख कार्यकारी अधिकृतमा रमेशराज अर्याल हुने छन् । उनी एनसीसी बैंकका प्रमुख कार्यकारी हुन् । कुमारीका खनाल वरिष्ठ डेपुटी प्रमुख कार्यकारी अधिकृत हुने छन् । एनसीसी बैंकका वरिष्ठ अधिकारीहरुले स्वेच्छिक अवकाश लिइसकेका छन् ।