अखबार नेपाल ट्रेन्डिङ

काठमाडौं: तरलता अभावकाबीच पनि बैंक तथा वित्तिय संस्थाहरुको नाफामा बृद्धि भएको छ । गत आर्थिक वर्षको ३ महिनालाई आधार मान्ने हो भने १४ वटा वाणिज्य बैंकको नाफामा वृद्धि भएको छ ।

सोमबार चालू आर्थिक वर्षको तीन महिनाको वित्तिय विवरण बैंकहरूले सार्वजनिक गरेका छन् । सार्वजनिक भएको तथ्यांकले प्रायः सबै बैंकको नाफा उल्लेख्य रहेको देखिन्छ ।

असोज महिनासम्ममा हाल कायम रहेका २६ वटा वाणिज्य बैंकहरुको निक्षेप संकलन ४५ खर्ब १९ अर्ब रुपैयाँ र कर्जा प्रवाह ४१ खर्ब ९३ अर्ब पुगेको छ ।

चालू आर्थिक वर्षको पहिलो त्रैमासमा बैंकहरुबीच ब्याजदरमा केही विवाद उत्पन्न भएको छ । भदौ मसान्तमा वणिज्य बैंकहरुले निक्षेपको ब्याजदर वृद्धि गर्ने निर्णय गरे । जस अनुसार अधिकांश बैंकहरुले निक्षेपको ब्याजदर बढाए । सो अनुसार स्वतः कर्जाको ब्याजदर समेत बढेको छ ।

बैंकहरुले कर्जा बढाएपछि उद्योगी व्यवसायीहरुले आन्दोलन गरिरहेका छन् । सुर्खेत, विराटनगरका उद्योगी व्यवसयीहरुले बैंकहरु चरम नाफामा हुँदा पनि ब्याजदर बढाएको आरोप लगाएका थिए । तर बैंकको नाफाको वृद्धिदर भने पहिलो त्रैमासमा औसत देखिएको छ ।

नाफा बढेका बैंकहरु

कुमारी बैंकको नाफा वृद्धिदर सबै भन्दा उच्च छ । यस बैंकको नाफा ८५.०७ प्रतिशतले बढेर १ अर्ब पुगेको छ । एनआईसी एशियाको नाफा ४८.७४ प्रतिशत बढेर १ अर्ब १५ पुगेको छ । नबिल बैंकको नाफा ४१.३० प्रतिशत बढेर १ अर्ब ५७ करोड पुगेको छ ।

राष्ट्रिय वाणिज्य बैंकको १८.६६ प्रतिशतले बढेर १ अर्ब २४ करोड रुपैयाँ पुगेको छ । ग्लोबल आईएमई बैंकको ६.९५ प्रतिशतले बढेर १ अर्ब १८ करोड पुगेको छ ।

नेपाल इन्भेष्टमेन्ट बैंकको नाफा २३.४७ प्रतिशतले बढेर १ अर्ब १४ करोड पुगेको छ । एभरेष्ट बैंकको नाफा ४८.९५ प्रतिशतले बढेर ८६ करोड रुपैयाँ पुगेको छ । स्ट्याण्डर्ड चार्टड बैंकको नाफा ६८.३९ प्रतिशतले बढेर ८१ करोड पुगेको छ ।

प्रभु बैंकको १०.७९ प्रतिशतले बढेर ७० करोड ५० लाख पुगेको छ । एसबीआई बैंकको ६८.२३ प्रतिशतले बढेर  ६२ करोड पुगेको छ । हिमालयन बैंकको नाफा १७.५८ प्रतिशतले बढेर ५३ करोड पुगेको छ ।

सिभिल बैंकको नाफा ४२.२३ प्रतिशतले बढेर ४१ करोड पुगेको छ । सेन्चुरी बैंकको नाफा १६.९ प्रतिशतले बढेर ३१ करोड पुगेको छ । बैंक अफ काठमाण्डूको १०.७१ प्रतिशतले बढेर २८ करोड पुगेको छ ।

नाफा घटेका बैंकहरु

गत आर्थिक वर्षको ३ महिनाको तुलनामा चालू आर्थिक वर्षको ३ महिनामा नाफा घट्ने बैंकहरु १२ वटा रहेका छन् । एनएमबी बैंकको नाफा १३.४३ प्रतिशतले घटेर ९० करोड कायम भएको छ ।

प्राइम कर्मसियल बैंकको नाफा १०.६१ प्रतिशतले घटेर ८७ करोड कायम भएको छ । नेपाल बैंकको नाफा १९.९७ प्रतिशतले घटेर ६० करोड कायम भएको छ । सानिमा बैंकको नाफा ३.४६ प्रतिशले घटेर ५४ करोड कायम भएको छ ।

एनसीसी बैंकको नाफा ०.२४ प्रतिशतले घटेर ५१ करोड कायम भएको छ । मेगा बैंकको नाफा ४४.३३ प्रतिशतले घटेर ५० करोड कायम भएको छ । लक्ष्मी बैंकको नाफा ८.९३ प्रतिशतले घटेर ५० करोड कायम भएको छ ।

सिटिजन्स बैंकको नाफा २७.०९ प्रतिशतले घटेर ५० करोड कायम भएको छ । सिद्धार्थ बैंकको नाफा ४७.४८ प्रतिशतले घटेर ४९ करोड कायम भएको छ । माछापुच्छ्रे बैंकको नाफा १९.६५ प्रतिशतले घटेर ४५ करोड कामय भएको छ।

कृषि विकास बैंकको नाफा ५४.४८ प्रतिशतले घटेर २२ करोड कायम भएको छ । सबै भन्दा कम नाफा कमाउने सनराइज बैंक देखिएको छ । यस बैंकको नाफा ६१.५ प्रतिशतले घटेर १६ करोडमा खुम्चिएको छ ।

चालू आर्थिक वर्षमा सबै भन्दा धेरै नाफा एनआईसी एशियाले गरेको छ । यस्तै, दोस्रोमा नबिल, तेस्रोमा राष्ट्रिय वणिज्य बैंक र चौथोमा ग्लोबल आईएमई बैंक देखिएको छ ।

यी चारै बैंकले गत आर्थिक वर्षको तुलनामा नाफा वृद्धि गरेका छन् । र, अन्य सूचक समेत सुचार गरेको देखिएको छ ।

एनआईसी एशिया बैंक लिमिटेडले चालू आर्थिक वर्ष प्रथम त्रैमासको वित्तिय विवरण अनुसार खुद मुनाफातर्फ १ अर्ब ७५ करोड आर्जन गर्न सफल भएको छ । जुन वार्षिक विन्दुगत आधारमा ४९ प्रतिशतको वृद्धि हो ।

बैंकले आव २०७९/८० को प्रथम त्रैमाससम्ममा कर्जा व्यवसायतर्फ कुल कर्जा रकम २ खर्ब ७३ अर्ब १० करोड पुर्याउन सफल भएको छ । निक्षेपतर्फ कुल निक्षेप संकलन ३ खर्ब ८ अर्ब १८ करोड पुर्याउन बैंक सफल भएको छ ।

यसैगरी बैंकको स्वपूँजीमा प्रतिफल २६.५५ प्रतिशत छ । बैंकले वार्षिक प्रति शेयर आम्दानी ५९ रुपैयाँ ६२ पैसा आर्जन गर्न सफल भएको छ । स्वपूँजीमा प्रतिफल र प्रतिशेयर आम्दानी २६ वटै वाणिज्य बैंकहरूमध्ये सबैभन्दा बढी रहेको अनुमान बैंकले गरेको छ ।

बैंकले कर्जा असुलीमा निकै उत्साहजनक नतिजा हासिल गर्न सफल भई निष्कृय कर्जालाई प्रथम त्रयमाससम्ममा ०.५९ प्रतिशतमा सीमित राख्न सफल भएको छ । ३ महिना अवधीमा २ लाखभन्दा बढी नयाँ ग्राहक थप गर्दै ३४ लाखभन्दा बढी ग्राहकमाझ सेवा प्रदान गर्दै आइरहेको जनाएको छ ।

यसै त्रैमाससम्ममा बैंकले कुल कर्जा लगानीको अंशमा करिब ८४ प्रतिशत साना तथा मझौला र रिटेल प्रकारका रणनीतिक क्षेत्रहरूमा कर्जा विस्तार गरेको छ ।

नबिल बैंकले चालु आर्थिक वर्षको पहिलो त्रैमासिकमा १ अर्ब ५७ करोड रुपैयाँ नाफा आर्जन गरेको छ । गत आर्थिक वर्षको तुलनामा ४१.३० प्रतिशतले नाफा बढाएको हो ।

गत आवको पहिलो पहिलो त्रैमासिकमा नबिलले १ अर्ब ११ करोड रुपैयाँ नाफा आर्जन गरेको थियो । ३ महिनामा बैंकले ३ खर्ब ३४ अर्ब रुपैयाँ निक्षेप संकलन गरि ३ खर्ब ५ अर्ब रुपैयाँ कर्जा प्रवाह गरेको छ । जसबाट बैंकले ३ अर्ब ६७ करोड रुपैयाँ खुद ब्याज आम्दानी गर्न सफल भएको देखिन्छ । सो अवधीमा बैंकको वितरण योग्य नाफा भने २ अर्ब ९१ करोड रुपैयाँ रहेको देखिन्छ ।

असोज मसान्त अवधीमा बैंकको प्रति सेयर आम्दानी २७ रुपैयाँ ५३ पैसा छ । बैंकको खराब कर्जा अनुपात २.३३ प्रतिशत छ । बैंकको आधार ब्याजदर ९ दशमलव ४५ प्रतिशत, स्प्रेड दर ४ दशमलव ०४ प्रतिशत भएको बैंकको वित्तिय विवरणले देखाएको छ ।

राष्ट्रिय वाणिज्य बैंकले सार्वजनिक गरेको वित्तिय विवरण अनुसार चालु आर्थिक वर्षको पहिलो त्रैमासमा खुद नाफा १९ प्रतिशत बढेको छ । बैंकले तीन महिनाको अवधिमा १ अर्ब २४ करोड ६६ लाख रुपैयाँ नाफा कमाएको छ । गत वर्षको ३ महिना बैंकले १ अर्ब ५ करोड ६ लाख रुपैयाँ नाफा कमाएको थियो ।

बैंकको खुद ब्याज आम्दानी ३ अर्ब १८ करोड ३८ लाख रुपैयाँ देखिएको छ । कुल सञ्चालन आम्दानी ३ अर्ब ४५ करोड ६ लाख रुपैयाँ, सञ्चालन मुनाफा १ अर्ब ७७ करोड ८३ लाख रुपैयाँ रहेको छ । बैंकको वितरण योग्य नाफा ३ अर्ब १७ करोड ४५ लाख रुपैयाँ देखिएको छ । निक्षेप २ अर्ब ६१ अर्ब ५४ करोड रुपैयाँ र कर्जा २ खर्ब १० अर्ब ७८ करोड रुपैयाँ रहेको वित्तिय विवरणमा उल्लेख छ ।

ग्लोबल आईएमई बैंकले चालू आर्थिक वर्षको पहिलो त्रैमासमा १ अर्ब १८ करोड रुपैयाँ नाफा कमाएको छ । गत आर्थिक वर्षको सोही अवधी भन्दा ६ दशमलव ९५ प्रतिशतले बढेको छ । गत आर्थिक वर्षको ३ महिना अवधीमा १ अर्ब ११ करोड रुपैयाँ नाफा कमाएको छ। थप विवरण सार्वजनिक हुन बाँकी छ । (नेपालखबरबाट)