अखबार नेपाल ट्रेन्डिङ

काठमाडौं: साताको तेस्रो दिन (मंगलबार) नेपाल स्टक एक्सचेन्ज (नेप्से) परिसुचक दोहोरो अंकले उकालो लागेको छ ।

हिजो (सोमबार) सामान्य अंक बढेर धानिएको नेप्सेमा मंगलबार ५३.३० अंकको वृद्धि भएको हो ।

आज अधिकांश कारोबार समय सामान्य अंकले घटबढ भएपनि अन्तिम समयमा आएर खरिद चाप बढ्दा नेप्से परिसुचक उच्च अंकले बढ्न पुगेको हो ।

बजारमा अधिकांश कम्पनीमा बिक्रीभन्दा खरिदचाप बढी देखिएको थियो । सोमध्येमा पनि जलविद्युत समुहका कम्पनीहरुमा लगानीकर्ताको उच्च आकर्षण देखिएको थियो ।

सोही अनुरुप बजारमा जलविद्युत समुहको परिसुचक सबैभन्दा बढी ४.३२ प्रतिशतले बढेको छ भने अतिरिक्त समुह ३.३८ प्रतिशतले उकालो लागेको छ ।

यस्तै आज फाईनान्स समुहको परिसुचक २.८५ प्रतिशतले बढ्दा विकास बैंक समुहको परिसुचक पनि २.७१ प्रतिशतले उकालो लागेको छ ।

बजारमा सबैभन्दा बढी प्रभुत्व रहेको बैंकिङ समुहको परिसुचकमा आज ०.८४ प्रतिशतको वृद्धि हुँदा माईक्रोफाईनान्स समुहको परिसुचक भने २.८२ प्रतिशतले बढेको देखिन्छ ।

आज कुल २ सय २४ कम्पनीको ६३ लाख ४३ हजार २ सय २८ कित्ता सेयर किनबेच हुँदा कारोबार रकम भने ३ अर्ब २३ करोड ३३ लाख १८ हजार पुगेको छ ।

आज न्यादी जलविद्युत कम्पनीको सेयरमूल्यमा सर्किट लागेको छ ।