अखबार नेपाल ट्रेन्डिङ

काठमाडौं: कोरोना भाइरसका कारण कतारले सबै सार्वजनिक यातायात सेवाहरू बन्द गर्ने घोषणा गरेको छ । देशभर कोरोना भाइरसको संक्रमण फैलिन नदिन कतारले यस्तो घोषणा गरेको हो । कतारी अमीर एच एच शेख तमीम बिन हमद अल थानीले संकट व्यवस्थापनको लागि सर्वोच्च समितिको बैठकमा दिएको निर्देशन अनुसार आगमन उडानहरू र सार्वजनिक यातायात सेवाहरू बन्दको घोषणा गरेको हो ।

परराष्ट्र मन्त्रालयका प्रवक्ता लोल्वा अल खटरका अनुसार दोहाका लागि कुनैपनि आगमन उडान बुधवार साँझदेखि १४ दिनका लागि बन्द गरिएको छ । यो प्रतिबन्ध दुई हप्तापछि पूनरावलोकन गरिनेछ । यद्यपि, हवाई कार्गो, ट्रान्जिट उडानहरू र कतारी नागरिकहरूको उडानलाई भने अनुमति दिइनेछ । त्यस्ता उडानहरूमा आउनेहरू दुई हप्ताको लागि क्वारन्टाइनमा बस्नुपर्ने छ ।

लोल्वा अल खटरले दोहा मेट्रो र कारवा बसहरूसहित सार्वजनिक यातायात गएराति १० बजेदेखि सञ्चालन बन्द भएका बताए । यसैबीच, कतारले कोरोनाको संक्रमणलाई थप फैलिन नदिन झन्डै चार हजार कामदारलाई क्वारन्टाइनमा राखेको छ । यसमा करिब दुई हजार नेपाली कामदार पनि छन् । जोखिम क्षेत्रमा परेका चारवटा कम्पनीमा कार्यरत कामदारलाई बिहीबारदेखि बाहिर निस्कन दिइएको छैन ।