अखबार नेपाल ट्रेन्डिङ

काठमाडौं: संघीय संसदको राष्ट्रियसभामा आजबाट १८ जना सांसदले २ बर्षे कार्यकाल पूरा गरेर आजबाट बिदा लिदैछन् । ५९ सदस्यीय राष्ट्रियसभामा एकतिहाई २ बर्षे कार्यकाल पूरा गरेर विदा लिन लागेका हुन् । गोलाप्रथाबाट २ बर्षे, ४ बर्षे र ६ बर्षे कार्यकाल गरेर एक तिहाई सदस्यले २ बर्षे कार्यकाल आजबाट पूरा गरेका हुन् ।

यसरी विदा हुनेमा १८ जना सांसद रहेका छन् । जसमा नेकपाका ८, कांग्रेसको ६, राजपाका २ र समाजवादी पार्टीका १ जना सांसद रहेका छन् । नेकपाबाट २ बर्षे कार्यकाल पूरा गर्नेमा अर्थमन्त्री डा युवराज खतिवडा सहित हरिचरण शिवाकोटी, बलराम बाँस्कोटा, मीना बूढा, युटोल तामाङ, राजकुमार कुँवर, कमलाकुमारी ओली, खेमराज नेपाली र कालीबहादुर मल्ल रहेका छन् ।

त्यस्तै कांग्रेसबाट संसदीय दलका नेता सुरेन्द्र पाण्डे, सचेतक सरिता प्रसाई, बद्री पाण्डे, विन्दादेवी आले, धना खतिवडा, मुत्तिकुमारी यादव लगायत रहेका छन् । २ बर्षे कार्यकाल भएका कांग्रेस सांसद दुर्गाप्रसाद उपाध्यायको क्यान्सरको कारण निधन भएको छ । त्यस्तै राजपाबाट वृषेशचन्द्र लाल, रमेशप्रसाद यादव र समाजवादीका रामप्रीत पासवान पनि २ बर्षे कार्यकाल पूरा गरेर विदा हुदैछन् ।

राष्ट्रियसभा अध्यक्षले २ बर्ष कार्यकाल पूरा गरेका सांसदहरुलाई आज औपचारिक कार्यक्रम गरेर सामूहिक फोटोसेशन गरेर विदाई गर्ने कार्यक्रम रहेको छ । त्यस्तै गत माघ ९ गते नै रिक्त हुने राष्ट्रिय सदस्यको निर्वाचन भैइसकेको छ । जसमा नेकपाबाट १६ जना र राजपाबाट २ जना निर्वाचित भएका सांसदहरुको भने भोली ११ बजे शपथ ग्रहण गराउने कार्यक्रम रहेको राष्ट्रियसभाले जनाएको छ ।