अखबार नेपाल ट्रेन्डिङ

काठमाडौं: सहिद स्मारक ए डिभिजन लिगमा आज तीन खेलहरु हुनेछन । पहिलो खेलमा उपाधिको दावेदार त्रिभुवन आर्मीले ब्रिगेड ब्याइजसँग प्रतिस्पर्धा गर्नेछ । यस्तै आजको दोस्रो खेलमा थ्रिस्टारले न्यूरोड टिम एनआरटीसँग खेल्नेछ ।

दिनको तेस्रो खेलमा नेपाल पुलिसले मनाङ मस्र्याङदीको सामना गर्नेछ । सातदोबाटो स्थित एन्फा मैदानमा विहान पौने नौ बजे हुने खेलमा आर्मीले ब्रिगेड ब्वाइजसँग खेल्नेछ । आज आर्मीले बीबीसीलाई पराजित गरेमा फेरी शिर्ष स्थानमा उक्लनेछ । यसका साथै उपाधिका लागि लिगको अन्तिम खेलमा मच्छिन्द्रको खेलले उपाधिको छिनोफानो गराउनेछ । मच्छिन्द्र भन्दा दुई अंकले पछाडी रहेको आर्मी पहिलो पटक ए डिभिजन लिग जित्ने संघारमा रहेको छ । यता ब्रिगेड ब्याइज १२ औं स्थानमा रहेको छ ।

आजै हुने अर्को खेलमा लिगको चौथो स्थानमा रहेको थ्रीस्टारले न्यूरोड टिम एनआरटीसँग खेल्नेछ । उपाधिको होडबाट बाहिरीसकेको थ्रीस्टार आज न्यूरोड टिम विरुद्ध जित निकाल्दै शिर्ष ६ को यात्रा पक्क गर्नेछ । उसले ११ खेलमा ६ मा जित निकाल्दै २० अंक बोकेको छ । यता शिर्ष ६ मा रहनले प्रयासमा रहेको न्यूरोड टिम आज थ्रीस्टार विरुद्ध नतिजा निकाल्ने लक्ष्यमा छ । उसको ११ खेलमा पाँच जितमा १५ अंक छ ।

लिग अन्तर्गत नै आजको तेस्रो खेलमा नेपाल पुलिस क्लवले मनाङ मस्र्याङदीसँग खेल्नेछ । लिगको तेस्रो स्थानमा रहेको मनाङले विभागिए टिम पुलिस विरुद्ध तीन अंक बटुल्दै उपाधि आफुलाई शिर्ष तीनमा राख्ने लक्ष्यमा हुनेछ । यस्तै लिगको छैटौं स्थानमा रहेको पुलिस भने मनाङ विरुद्ध तीन अंक खोस्ने लक्ष्यमा छ । आजको खेलमा मनाङविरुद्ध जित निकालेमा पुलिसको शिर्ष ६ रहने संभावना बलियो हुनेछ । उसका ११ खेलमा १७ अंक छ । मनाङको ११ खेलमा २२ अंक छ । लिगबाट सरस्वती युथ क्लब एक खेल अगाबै घटुवा भईसकेको छ । अब लिगको विजेता र शीर्ष ६ मा रहने टोलीको टुंगो लाग्न बाँकी छ । शीर्ष ६ भित्र रहने टिमले राष्ट्रिय लिग खेल्नेछ ।