अखबार नेपाल ट्रेन्डिङ

काठमाडौं: आईसीसी विश्व क्रिकेट लिग-२ मा ओमानले नेपाललाई ८ विकेटले पराजित गरेको छ । ओमनले २ सय ५० रनको लक्ष्य ४७.२ ओभरमा २ विकेट गुमाएर नेपाल बिरुद्ध यो दोस्रो जित निकालेको हो । ओमानका लागि अकिब ईल्यासले १ सय ९ रन बनाएका थिए । उनले १ छक्का र १२ चौका प्रहार गरेका थिए । त्यसैगरी जिसान मकसुदले ६८ रनको पारी खेलेका थिए ।

नेपालका लागि सुसन भारी र कुसल मल्लले १-१ विकेट लिएका थिए । नेपालले बलिङमा खासै उल्लेखनीय प्रदर्शन गर्न सकेन । नेपालले निर्धारित ५० ओभरको खेलमा ८ विकेट गुमाउँदै २ सय ४९ रन बनाएको थियो । नेपालका लगि कप्तान ज्ञानेन्द्र मल्लले ५६ रन बनाएका थिए । ७६ बल खेल्दै ज्ञानेन्द्रले ७ चौका र १ छक्का प्रहार गरेका थिए । त्यसैगरि पारस खड्काले ३८ रन बनाए भने बिनोद भण्डारीले ३५ रनको योगदान दिएका थिए । नेपाली ब्याटिङ तर्फ कुशल मल्ल र आरिफ शेखले २८-२८ रन बनाए भने सुवास खकुरेलले २२ रनको योगदान दिए ।

ओमानका लागि अकिब ईल्यासले ४ र मोहम्मद नदिमले ३ विकेट लिएका थिए । पहिलो खेलमा ओमानले नेपाललाई १८ रनले पराजित गरेको थियो । आइसीसी विश्व कप क्रिकेट लिग-२ सन् २०२३ मा आयोजना हुने विश्वकप क्वालिफायर खेल हो । लिग-२ मा नेपाल, अमेरिका, ओमान, स्कटल्यान्ड, नामिविया, युएई र पपुवा न्युगिनी रहेका छन् । उक्त लिग सन् २०१९ को अगस्टदेखि शुरु भएको हो ।

लिगको शीर्ष तीन टोलीले सन् २०२३ को विश्वकप क्रिकेटको छनोटमा सोझै स्थान बनाउने छन् । बाँकी चार टोलीले विश्वकप छनोटमा प्रवेश पाउनका लागि फेरी प्लेअफ खेल्नेछन् । उक्त प्लेअफमा लिग-२ बाट आउने चार टोली तथा च्यालेञ्ज लिगबाट आउने दुई टोलीले प्रतिस्पर्धा गर्नेछन् । विश्वकप छनोट सन् २०२२ मा आयोजना हुनेछ । विश्वकप छनोटमा सुपर लिगका पुछारका पाँच, लिगबाट आएका तीन तथा प्लेअफबाट आउने दुई टोली गरी १० टोलीले प्रतिस्पर्धा गर्नेछन् । विश्वकप छनोटको विजेता र उपविजेता टोलीले सन् २०२३ मा भारतमा आयोजना हुने विश्वकप क्रिकेटमा भाग लिन पाउने छन् ।