अखबार नेपाल ट्रेन्डिङ

काठमाडौं: प्राइम कमर्सियल बैंकको नाफा १ सय ३० करोड रुपैयाँ पुगेको छ । आर्थिक वर्ष २०७६/७७ को पहिलो ६ महिनामा १ अर्ब ३० करोड ७ लाख रुपैयाँ नाफा कमाएको हो । प्राइमको यो नाफा अघिल्लो वर्षको सोही समयमा कमाएको नाफाभन्दा २२.६२ प्रतिशत बढी हो । अघिल्लो वर्ष सो बैंकको नाफा १ अर्ब ६ करोड थियो ।

बैङ्कले पुस मसान्तसम्ममा ८० अर्ब ३५ करोड रुपैयाँ निक्षेप संकलन गरी ८० अर्ब ९१ करोड रुपैयाँ कर्जा प्रवाह गरेको छ । निक्षेप र कर्जाको यो आकार अघिल्लो वर्षको तुलनामा क्रमशः ३ अर्ब र ९ अर्बले बढी हो । अघिल्लो वर्षको सोही समयमा बैंकको निक्षेप करिब ७७ अर्ब र कर्जा ७२ करोड रुपैयाँ थियो ।

पुस मसान्तसम्म बैंकको जगेडा कोष ३ अर्ब १९ करोड रुपैयाँ छ । यो कोष अघिल्लो वर्षको तुलनामा करिब ६९ करोड रुपैयाँले बढी हो । बैंकले आफ्नो चुक्ता पुँजी ९ अर्ब ६८ करोड रुपैयाँ रहेको देखाएको छ तर यो घोषित १६ प्रतिशत बोनस समायोजन हुनुभन्दा अघिको अवस्था हो । बैङ्कसँग अघिल्लो वर्षको नबाँडिएको नाफा २ अर्ब ४६ करोड रहेको छ । यही कोषबाट प्रस्तावित लाभांश वितरण हुनेछ ।

बैंकले अघिल्लो वर्षको तुलनामा ब्याज आम्दानीमा उल्लेख्य र ब्याज खर्चमा सामान्य वृद्धि गरेको छ । ब्याज आम्दानी ४ अर्ब ८१ करोडबाट बढेर ५ अर्ब ४८ करोड पुग्दा ब्याज खर्च ३ अर्ब ४ करोडबाट ३ अर्ब ३२ करोड रुपैयाँ पुगेको बैंकले जनाएको छ । ६ महिनामा बैंकको कर्मचारी खर्च अघिल्लो वर्ष ३५ करोड ५२ लाख रहेकोमा यो वर्ष ४८ करोड ९६ लाख रुपैयाँ पुगेको हो । अन्य सञ्चालन खर्च करिब १३ करोड बढेर १८ करोड पुगेको छ ।

पुस मसान्तसम्म सो बैंकको पुँजी पर्याप्तता अनुपात १३.२३ प्रतिशत छ । निष्क्रिय कर्जा अनुपातलाई १.५८ प्रतिशतबाट १.४५ प्रतिशतमा पुगेको छ । बैंकको यो वर्ष कस्ट अफ फण्ड केही घट्दा बेसरेटमा पनि सामान्य सुधार देखिएको छ । पुस मसान्तसम्म सो बैङ्कको कस्ट अफ फण्ड ७.६५ प्रतिशत र बेसरेट ९.४५ प्रतिशत छ । अघिल्लो वर्ष कस्ट अफ फण्ड ८.२९ प्रतिशत बेसरेट १०.१७ प्रतिशत थियो । बैंकको निक्षेपमा दिने औसत ब्याज र कर्जामा लिने औसत ब्याजदरको अन्तर भने ४.३३ प्रतिशत छ । यो अनुपात राष्ट्र बैंकले तोकेको ४.४० प्रतिशतको सीमाभित्र हो ।