अखबार नेपाल ट्रेन्डिङ

काठमाडौं: नेपाल प्रिमियर लिग (एनपीएल) क्रिकेटमा आज दुई खेलहरु हुँदै छन् । पहिलो खेल बिहान ११:४५ बजे जनकपुर बोल्ट्स र विराटनगर किङ्स तथा दोस्रो खेल अपरान्ह ४ बजे सुदूरपश्चिम रोयल्स र कर्णाली याक्सबीच प्रतिस्पर्धा हुनेछ ।

विराटनगर र सुदूरपश्चिम अपराजित यात्रा कायम राख्ने लक्ष्यमा हुनेछन् भने जनकपुर र कर्णालीका लागि पुनरागमनको दबाब छ । जारी संस्करण विराटनगरले बलियो उपस्थिति देखाइरहेको छ । पहिलो खेलमा पोखरा र दोस्रो खेलमा काठमाण्डुविरुद्ध फराकिलो जित निकाल्दै विराटनगर सहज रुपमा प्लेअफ पुग्ने बाटोमा छ । गत संस्करणमा राम्रो प्रदर्शन गर्न नसकेको विराटनगरलाई यस पटक उपाधिको दाबेदार मानिएको छ ।

घरेलु र विदेशी खेलाडीको तालमेलले गति लिनु विराटनगरको बलियो पक्ष भएको छ । यता, साबिक विजेता जनकपुर पहिलो खेलमै काठमाण्डुसँग ५ विकेटले स्तब्ध बन्यो । उपाधि रक्षा अभियानमा रहे पनि जनकपुरले एकाध बाहेकका खेलाडीबाट योगदान पाउन सकेको छैन । कागजी रुपमा बलियो देखिए पनि अपेक्षाकृत प्रदर्शन गर्न नसकेको जनकपुरलाई विराटनगरविरुद्ध पुनरागमन गर्दै लय समाउने चुनौती छ ।

आजै हुने दोस्रो खेलमा सुदूरपश्चिम र कर्णाली आमनेसामने हुनेछन् । सुरुवाती दुवै खेल जितेको सुदूरपश्चिम अपराजित रहँदै प्लेअफ पुग्ने लक्ष्यमा छ । गत संस्करणमा उत्कृष्ट प्रदर्शनका बाबजुद फाइनलमा स्तब्ध बनेको सुदूरपश्चिम यस पटक उपाधि जित्ने दाउमा छ । घरेलु क्रिकेटका सफल र अनुभवी विदेशी ब्याटरको साथ पाएको सुदूरपश्चिममा तल्लो क्रमसम्म पनि थुप्रै विकल्पहरु छन् । जुन सुदूरपश्चिमको बलियो पक्ष हो ।

एनपीएलका ८ खेलसकिँदा काठमाण्डु गोर्खाजले ३, जनकपुर बोल्ट्सले १ र अन्य सबै टोलीले २–२ खेल खेलिसकेका छन् । पहिलो पटक प्यारापिट र फ्लड लाइटमा खेलाइएको एनपीएलले नेपाली क्रिकेटमा नयाँ उत्साह सिर्जना गर्दा मैदानको प्रतिस्पर्धा समेत तीव्र बनिरहेको छ । अहिलेसम्म ब्याटिङमा विदेशी खेलाडी हावी देखिँदा बलिङमा भने नेपाली खेलाडीले साख बचाएका छन् ।

८ खेल सम्पन्न हुँदा सुदूरपश्चिम रोयल्स र विराटनगर किङ्स अपराजित छन् । समान ४–४ अंक जोडे पनि नेट रन रेट आधारमा विराटनगर शीर्ष स्थानमा छ । यी दुवै टोलीले काठमाण्डु गोर्खाज र पोखरा एभेन्जर्सलाई हराएका हुन् । १ खेल खेलेको जनकपुर बोल्ट्स र २ खेल खेलिसक्दा पोखरा एभेन्जर्सले कुनै खेल जितेको छैन ।