अखबार नेपाल ट्रेन्डिङ

काठमाडौं: जनआकाश साप्ताहिकले आफ्नो १७औं वार्षिकोत्सव बिहीबार राजधानीमा एक कार्यक्रमको आयोजना गरी सम्पन्न गरेको छ । प्रतिनिधिसभाका उपसभामुख माननीय इन्दिरा रानामगरको प्रमुख आतिथ्यमा कार्यक्रममा दीप प्रज्वलन गरी वार्षिकोत्सवको उद्घाटन गरेकी थिईन् ।

वार्षिकोत्सवको अवसरमा जनआकाश मिडियाका अध्यक्ष मोहन कार्कीद्वारा लिखित ‘कृपज’ (कृषि, पर्यटन र जलविद्युत) नामक पुस्तक विमोचन गर्दै उपसभामुख रानामगरले नेपालमा कृषि, पर्यटन र जलविद्युतको अपार सम्भावना भएपनि उचित प्रयोग गर्न चुकिरहेको बताईन् । सकारात्मक सोचको विकास गर्दै देश निर्माणमा लाग्नुपर्ने उनको भनाइ थियो । नेपालीपन अरुले नक्कल गर्न थालेको र स्वयं नेपालीले भने आफ्नोपन छाड्दै गएकोमा उनले चिन्ता व्यक्त गरिन् । उनले बाल्यकालदेखि नै सकारात्मक सोचको विकास गर्नुपर्नेमा जोड दिइन ।

उपसभामुख रानामगरले संघर्षबाट खारिएर अघि बढेका कार्कीलाई ‘कृपज’ले स्पष्ट निर्देश गरेकोमा खुशी व्यक्त गर्दै कृति सफलकको सफलताको शुभकामना व्यक्त गरिन् । म आफै पनि सानो छँदा दुःख गरेरै अघि बढ्दै अहिले पनि सामाजिक क्षेत्रमै बालबालिकाको लागि काम गरेर आएकी व्यक्ति हुँ । कतिपय बालबालिकाको आमा बाबुकै टुङ्गो नलागेका कोहीका बाबुआमा जेल परेका पिडितहरु छन्, तिनीहरुलाई बिभिन्न ठाउँबाट सहयोग जुटाएर शिक्षा, दिक्षा दिईरहेकी छु र उनीहरुलाई एउटै परिवार जस्तो गरी बुबाआमा, दाजुभाई, दिदीबहिनी जसरी पालन पोषण गरी हुर्काइरहेकी उल्लेख गर्दै हाल स्कुल सञ्चालन गरिरहेको बताइन् ।

वार्षिकोत्सवको अवसरमा कार्कीद्वारा लिखित ‘कृपज’ माथि समिक्षात्मक टिप्पणी गर्दै दामोदर दीपकले विद्रोह संघर्ष र लगनशीलताबाट परिचितका रुपमा पहिचान स्थापित गरेका मोहन कार्कीले राष्ट्र निर्माणका संवाहकका रुपमा स्थापित भएको बताउँदै यो देशमा योजनाविद तथा राजनैतिक नेतृत्वले कार्कीद्वारा लेखिएको ‘कृपज’ कृषि पर्यटन र जलविद्युतका क्षेत्रमा इमान्दारीका साथ लागू गर्ने हो भने देश विकासका लागि लामो समय कुर्न नपर्ने बताए ।

सो अवसरमा विशेष अतिथि नेपाल राष्ट्रिय व्यवसायी महासंघका कुमार कार्कीले विचौलियाहरुको अन्त नभई देशको विकास गर्न नसकिने धारण राखे । त्यसैगरी पर्यटन विज्ञ खुम बहादुर सुवेदीले कार्यक्रमको शुभकामना दिदै पर्यटन क्षेत्रको बृहत्तर विकासको लागि पर्यटनको समुचित विकास गर्नुपर्ने आवश्यकता रहेको औल्याए । यसैगरी अर्का विशेष अतिथि नेपाल पत्रकार महासंघका केन्द्रीय सदस्य शान्तराम विडारीले स्वदेशी र आत्मनिर्भरमुखी पत्रपत्रिकालाई जोगाउन सरकारले उपयुक्त भूमिका खेल्नुपर्नेमा जोड दिंदै नेपालको विज्ञापन वोर्डको औचित्य नभएको भन्दै विज्ञापन वोर्डले पछिल्लो समय गरेको गलत निर्णयप्रति असन्तुष्ट व्यक्त गरे ।

कार्यक्रममा विशेष अतिथि उपसभामुख रानामगरबाट समाजका बिभिन्न क्षेत्रमा आवद्ध साहित्यकार, पत्रकार लगायत विभिन्न विधाका व्यक्तित्वहरुलाई सम्मान-पत्र, कदर-पत्र तथा मायाको चिनो प्रदान गरी सम्मानत गरिएको थियो । त्यसैगरी जनआकाश साप्ताहिकमा लेख, रचना पठाइ उत्कृष्ट हुनेहरुलाई र जन आकाश टिभी युटुब च्यानलबाट गीत, कविता, गजल, प्रशारणमा भाग लिइ उत्कृष्ट प्रस्तुती दिने प्रतिभा तथा नवप्रतिभाहरुलाई कदर-पत्रले सम्मानित गरिएको थियो ।

कार्यक्रमको समापनमा सभाध्यक्ष मोहन कार्कीले योग्य तथा अग्रज स्रष्टालाई सम्मान गर्ने अवसर पाउँदा आफू अत्यन्त हर्षित भएको बताउँदै कार्यक्रमलाई सफल बनाउन उपस्थित भएका सम्पूर्णलाई हार्दिक आभार व्यक्त गरे । कार्यक्रममा साहित्यकार दुर्गा अधिकारी ‘भमरकोटे’कवि द्वारिका कुइँकेल, एली खड्का, सानू शर्मा, लगायतले रचना वाचन गरेका थिए । कार्यक्रममा स्वागत मन्तव्य जन आकाश मिडियाका पत्रकार विनोद कार्कीले गरेका थिए । कार्यक्रमको सञ्चालन रामेछाप सांस्कृतिक कालकार समाजका सचिव नकुल गौतमले गरेका थिए ।