अखबार नेपाल ट्रेन्डिङ

काठमाडौं: ओमानमा जारी एसिसी प्रिमियर कप टी-२० क्रिकेट प्रतियोगिता अन्तर्गत हङकङले नेपाललाई  ११५ रनको लक्ष्य दिएको छ । वर्षाका कारण ढिलो सुरु भएको खेल १८ ओभरको खेलाईएको थियो ।

टस जितेर नेपालले फिल्डिङ रोजेपछि पहिले ब्याटिङ गरेको हङकङ १ बल बाँकी छँदा ११४ रन बनाएर अलआउट भयो । हङकङका ओपनर मार्टिन कोट्जेलाई करण केसीले तेस्रो ओभरमा ८ रनमा आसिफ शेखबाट क्याच गराए । यस्तै छैटौं ओभरमा हङकङका कप्तान निजाकत खानलाई दीपेन्द्रसिंह ऐरीले १२ रनमा रनआउट गरे ।

हङकङका लागि सबैभन्दा बढी रन बनाएका अंशुमन रथलाई नवौं ओभरमा नेपालका गुल्सन झाले बाउन्ड्री नजिकबाट डाइरेक्ट हिटमार्फत् ३४ रनमा रनआउट गरे । त्यसपछि हङकङका ब्याटर चल्न सकेनन् । बाबर हायतलाई ६ रन र एजात खान ७ रनमा ललित राजवंशीले आउट गरे । यस्तै यसिम मुर्ताजालाई २ रन र नास्रुल्ला रानालाई ६ रनमा अभिनास बोहराले आउट गरे । यस्तै अभिनास बोहराले व्यक्तिगत तेस्रो विकेट लिने क्रममा १७औं ओभरमा जीशन अलीलाई १४ रनमा दीपेन्द्रबाट क्याच गराए । दीपेन्द्रले १८औं ओभरको चौथो बलमा इशान खानलाई ११ रनमा बोल्ड गरे लगत्तै अर्को बलमा धनञ्जय रावलाई बोल्ड गरे ।

बलिङमा अभिनासले ३ विकेट लिए भने ललित र दीपेन्द्रले २-२ विकेट लिए । करण केसीले १ विकेट हात पारे । अभिनासले ४ ओभरमा २९ रन खर्चिए । ललितले ४ ओभरमा १ मेडन राख्दा १४ रन मात्र दिए । दीपेन्द्रले ५ बलमा ६ रन खर्चिए । करणले ४ ओभरमा २४ रन दिए ।

१० टिम सहभागी प्रतियोगितामा नेपाल समूह ‘ए’मा छ । नेपालको समूहमा मलेसिया, कतार, हङकङ र साउदी अरेबिया छन् । आयोजक ओमान समूह ‘बी’ मा छ । समूहमा ओमानसहित युएई, कुवेत, बहराइन र कम्बोडिया छन् । नेपालले चौथो खेल साउदी अरेबियासँग वैशाख ५ गते खेल्नेछ ।

समूहमा शीर्ष दुई टिम सेमिफाइनल पुग्नेछन् । सेमिफाइनल वैशाख ७ गते र फाइनल वैशाख ९ गते हुनेछ । यो प्रतियोगिता जित्ने टिम सन् २०२५ को एसिया कपमा पुग्नेछ । सन् २०२५ को एसिया कप टी-२० फर्म्याटमा हुनेछ । शीर्ष तीन टिमले एसिसी इमर्जिङ टिम्स एसिया कप खेल्नेछन् ।