अखबार नेपाल ट्रेन्डिङ

काठमाडौं: नेपाल सुपर लिग (एनएसएल)को पहिलो क्वालिफायरमा आज पोखरा थण्डर्स र धनगढी एफसीबीच प्रतिष्पर्धा । खेल त्रिपुरेश्वरस्थित दशरथ रंगशालामा अपराह्न ५:३० बजे हुनेछ ।

लिग चरणमा पहिलो स्थान हासिल गरेको पोखरा र दोस्रो स्थान हासिल गरेको धनगढी पहिलो क्वालिफायरमा भिड्न लागेका हुन् । दुवै टिम पहिलो क्वालिफायरमा जित निकाल्दै फाइनलमा स्थान सुरक्षित गर्न चाहन्छन् । धनगढी प्रतियोगिताको साविक उपविजेता हो भने पोखराले दोस्रो सिजनमा आएर प्लेअफमा स्थान बनाउन सफल भएको टिम हो ।

खेलमा जित निकाल्ने टिम फाइनलमा पुग्नेछ । पराजित हुने टिमले क्वालिफायरको दोस्रो मौका पाउनेछ । उसले इलिमिनेटर राउण्ड जितेर आउने काठमाडौं वा ललितपुरसँग खेल्नेछ । लिगको अन्तिम खेलमा धनगढीलाई बराबरीमा रोकेको पोखराले लिग चरणमा सर्वाधिक ४ जित निकालेको छ । लिग चरणको प्रदर्शनले पोखरालाई दोस्रो संस्करणको उपाधिको मुख्य दाबेदारको रूपमा अघि सारेको छ ।

पोखराका मोसेस टोम सर्वाधिक गोलकर्ताको दौडमा अघि छन् । उनले सर्वाधिक ५ गोल गरेका छन् । धनगढीविरुद्ध पछिल्लो खेलमा गोल गरेका उनीसँग धनगढी पक्कैपनि सतर्क रहनेछ । धनगढीका पछिल्ला केही खेल सुखद रहेनन् । प्रतियोगितामा शानदार सुरुवात गरेको धनगढीले पछिल्लो खेलमा पोखरासँग बराबरी मात्र खेलेन, त्यसअघि झापासँग २–० को हार व्यहोर्यो । झापासँग हार्नुअघि काठमाडौंसँग निराशपूर्ण बराबरीको नतिजा निकालेको थियो । पछिल्ला खेलमा लय गुमाएको धनगढीलाई पोखराविरुद्ध उत्रदै गर्दा सुरुवातमा देखिएको जितको भोकलाई फर्काउन आवश्यक छ ।