अखबार नेपाल ट्रेन्डिङ

काठमाडौं: नेपाल सुपर लिगमा बुटवल लुम्बिनीसँग बिरगञ्ज युनाईटेड १-० गोल अन्तरले पाराजित भएको छ । बिरगञ्जलाई हराउन बुटवलका लागि इन्जुरी समयमा चन्दन दासले विजयी गोल गरे ।

बुटवलसँग हारेको बिरगञ्ज प्लेअफको दौडबाट बाहिरिएको छ । बुटवललाई हराउँदै प्लेअफमा स्थान पक्का गर्ने अवसर बिरगञ्जसँग थियो । तर लिग चरणको अन्तिम खेलमा बिरगञ्जले जित निकाल्न सकेन । बिरगञ्जको हारसँगै त्यसको फाइदा ललितपुर, काठमाडौं र झापालाई पुगेको छ ।

जितसँगै बुटवल ८ खेलमा १० अंकसहित पाँचौ स्थानमा छ । ललितपुर र झापाको पनि समान १० अंक छ तर हेड टु हेडमा ललितपुर अघि छ । वीरगन्ज भने ८ खेलमा ८ अंकसहित आठौं स्थानमा रहेर लिग अन्त्य गरेको छ ।

आजको अन्तिम खेलमा काठमाडौं रेजर्सले जित हासिल गरे काठमाडौं प्लेअफ पुग्नेछ, ललितपुरको जित वा बराबरीले झापा अघि बढ्नेछ । ललितपुर सिटी र काठमाडौं रेजर्सको खेल साँझ ५ बजे सुरु हुनेछ ।