अखबार नेपाल ट्रेन्डिङ

काठमाडौं: संयुक्त राष्ट्रसंघका महासचिव एन्टोनियो गुटेरेस उच्चस्तरीय भेटवार्ताका लागि सिंहदरबार पुगेका छन् । सिंहदरबारमा उनले प्रधानमन्त्री पुष्पकमल दाहाल प्रचण्ड, उपप्रधान एवं रक्षामन्त्री पूर्णबहादुर खड्का र परराष्ट्रमन्त्री एनपी साउदसँग भेट्ने कार्यसूची रहेको छ ।

गुटेरेसले सुरुमा परराष्ट्रमन्त्री साउदसँग भेटघाट गरेका छन् । उनलाई मन्त्रालयका सहसचिव सेवा लम्सालले स्वागत गरेकी थिइन् । त्यस्तै गुटेरेसले आजै नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीसँग भेट्ने कार्यक्रम रहेको छ । उनले आजै राष्ट्रपति रामचन्द्र पौडेललाई पनि भेट्नेछन् ।

उपप्रधान एवं गृहमन्त्री नारायणकाजी श्रेष्ठसँग आज भेटवार्ताका लागि तय भएको कार्यक्रम भने मंगलबारका लागि सारिएको जनाइएको छ । नेपालको चारदिने औपचारिक भ्रमणका लागि गुटेरेस आजै नेपाल आइपुगेका हुन् । यसअघि उनलाई त्रिभुवन अन्तर्राष्ट्रिय विमानस्थलमा परराष्ट्रमन्त्री साउदसहितको टोलीले स्वागत गरेको थियो ।