अखबार नेपाल ट्रेन्डिङ

काठमाडौं: नेपालले चार देश सम्मिलित महिला टि-२० आई सिरिजको फाइनलमा हङकङसँग खेल्ने भएको छ । नेपाल र हङकङबीचको फाइनल शनिबार हुनेछ ।

नेपाल अन्तिम खेलमा मलेसियासँग ६ विकेटले पराजित भएपनि नेट रन रेटको कारण शीर्षस्थानमा रहँदै फाइनलमा स्थान बनाएको हो । हङकङले मलेसियालाई नेट रन रेटले पछि पार्दै दोस्रो स्थानमा रहँदै फाइनलमा स्थान बनाएको हो ।

नेपाल ३ खेलमा २ जित र १ मा हारसहित ४ अंकका साथ शीर्षस्थानमा रह्यो । नेपालको नेट रन रेट ०.८५३ रह्यो । नेपालले कुवेतलाई ३४ रन र हङकङलाई ६ विकेटले हराएको थियो । हङकङ ३ खेलमा २ जित र १ मा हारसहित ४ अंकका साथ दोस्रो स्थानमा रह्यो । हङकङको नेट रन रेट ०.१९२ रह्यो । हङकङले कुवेतलाई १६ रन र मलेसियालाई १० विकेटले हराएको थियो ।

मलेसिया ३ खेलमा २ जित र १ मा हारसहित ४ अंक नै भएपनि नेट रन रेटका कारण तेस्रो स्थानमा रहेर फाइनल खेल्न सकेन । मलेसियाको नेट रन रेट ०.००७ रह्यो । कुवेत भने ३ खेलमा तीनै मा हारका साथ अंक बिहिन हुँदै पुछारमा रहेर बाहिरियो ।

तेस्रो स्थानको लागि शनिबार मलेसिया र कवेतबीच प्रतिस्पर्धा हुनेछ । आइसिसी महिला टि-२० विश्वकप एसिया क्षेत्र छनोट अघि तयारीको लागि यी चार देशले सिरिज खेलेका हुन् । एसिया क्षेत्र छनोट अगष्ट ३१ देखि ९ सेप्टेम्बरमा मलेसियामा खेल्नेछ । नेपालको समूहमा युएई, कतार, मलेसिया, भुटान र बहराइन छन् ।

समूह बी मा चीन, हङकङ, कुवेत, म्यानमार र थाईल्यान्ड छन् । शीर्ष दुई टोली सेमिफाइनल खेल्नेछन् । फाइनल पुग्ने दुई टोलीले २०२४ मा ग्लोबल महिला टि-२० विश्वकप खेल्न पाउनेछन् ।