अखबार नेपाल ट्रेन्डिङ

काठमाडौं: नेपाली कथानक चलचित्र ‘गोर्खा वारिअर’को प्रिमियरका लागि निर्माता तथा निर्देशक मिलन चाम्स हालै बेलायत पुगेका छन् ।

सेप्टेम्बर १० तारिक लन्डनमा हुन लागेको उक्त चलचित्रको प्रिमियरका लागि निर्देशक चाम्स लन्डन पुगेका हुन् । निर्देशक चाम्सलाई अनुग्रह ज्वेलर्स यूकेका प्रोपाइटर समेत रहेका र चलचित्र निर्माता सुमन राई, बेलायतका लागि मिडिया कोअर्डिनेटर न्यू होराइजन क्रियसनका आकाश सुनुवार, सन्तोषकुमार सुवेदी, रितेश चाम्स, सूर्य नेम्वाङ, भिम तामाङ लगायतले स्वागत गरेका थिए ।

सिनेमाको रेडकार्पेट प्रिमियर शो आइम्याक्स सिने वर्ल्ड लेस्टर स्क्वायरमा हुने बताइएको छ । निर्माता तथा निर्देशक चाम्सले वीर पूर्खाहरुलाई हेर्ने ऐतिहासिक दिन (प्रिमियर)लाई भब्य सफल बनाउन सबैमा अपिल पनि गरेका छन् । प्रिमियरमा धरान उपमहानगरपालिका मेयर हर्क साम्पाङ, विजय लामासहित फिल्मका कलाकारहरु पनि लन्डन पुग्ने बताईएको छ ।

युद्धको कथामा बनेको ‘गोर्खा वारिअर’ मा सन् १९४९ मा मलाया जङ्गलमा बेलायती सेनामा आबद्ध गोर्खा सैनिकले लडेको लडाइँको कथा छ । नेपाली, अङ्ग्रेजी र हिन्दी भाषामा प्रदर्शन गर्ने तयारी रहेको चलचित्रमा रितेश चाम्स, विजय लामा, रेविका गुरुङ, रियर राई, शिशिर बाङ्देल, कविता आले, बिरूप घले, सारा राईलगायतका कलाकारले अभिनय गरेका छन् ।

चलचित्रमा निर्देशक चाम्स र गिरिराज घिमिरेको लेखन, मिलन श्रेष्ठको सम्पादन, सुदीप बरालको डिओपी, हिमाल केसीको द्वन्द्व निर्देशन रहेको छ ।